امریکا(پاکستان پوائنٹ نیوز07۔جنوری2017ء) 5مسافراں نوں لیجان والا اک جہاز جو تقریبن اک ہفتہ پہلاں لاپتا ہو گیا سی، پانی وچوں لبھ گیا۔ تفصیل دے مطابق غوطہ خوراں نے اک کھوجی دی مدد نال جہاز وی برآمد کر لیا اے۔ خوطہ خوراں نے کلیولینڈ توں تھوڑا دور سمندر اُتے شام ہون مگروں وی جہاز دی بھال جاری رکھی۔ متعلقا حکام نے دسیا کہ جہاز دے ملبے دی بھال دا کم پیر توں دوبارا شروع کیتا جائے گا تے ایہ کم اودوں تیکر جاری رہوے گا جدوں تیکر تسلی نہیں ہوندی کہ اسیں ممکنا حد تیکر اپنی کوشش کر لئی اے۔
خوطہ خوراں نے سگنلز دی پیروی کردے ہوئے آہستہ آہستہ سمندر وچ لتھنا شروع کیتا سی۔ جہاز وچ سوار سارا گروہ ڈاﺅن ٹاﺅن کلیولینڈ اندر اک تقریب وچ رلت دے بعد کولمبس واپس آ رہیا سی۔ جہاز نوں کولمبس بیوریج ڈسٹری بیوشن دے صدر جان ٹی فلیمنگ اُڈا رہے سن جدکہ جہاز وچ سوار مسافراں وچ اوہناں دی بیوی، دھیاں تے گوانڈھی وی شامل سی۔ جہاز اُڈان بھرن دے تھوڑی دیر بعد ای ریڈار توں غائب ہویا۔ جہدے بعد جہاز دی بھال دا کم شروع کیتا گیا سی جدکہ ہن جہاز دے ملبے دا کُجھ حصہ وی برآمد کر لیا گیا اے۔ دوجے پاسے جہاز وچ موجود کجھ مسافراں دیاں آخری رسماں ایتوار نوں ادا کیتیاں جان گیاںجدکہ باقیاں بارے اجے کوئی اعلان نہیں کیتا گیا۔
