جدہ(پاکستان پوائنٹ نیوز05۔جنوری2017ء) سعودی عرب دی سینئر شوری کونسل دے رکن شیخ احمد بن علی المبارکی نے اپنے اک بیان وچ آکھیا اے کہ جعلی ڈگری راہیں کسے وی طرحاں دی نوکری کرنا اک غیر اسلامی کم اے، انج کرنا مکمل طور اُتے اسلامی تعلیمات خلاف اے۔ شیخ احمد بن علی دا ہور کہنا سی کہ ایس گناہ توں توبہ صرف اک ای صورت وچ ہو سکدی اے کہ جعلی ڈگری نال حاصل کیتی گئی نوکری نوں چھڈ دِتا جائے، جعلی ڈگری لینا دھوکھا دین دے برابر اے، اسلام ایس کم توں روکدااے۔
اوہناں نے ایس توں اگانہ ودھ کے گل کردے ہوئے آکھیا کہ پرچیاں وچ نقل کر کے ڈگری لینا وی غیر اسلامی اے۔ ڈگریاں دی ویچ وٹک کرن والے اصل وچ غیر اسلامی کم کردے نیں۔ ایہ سارے کم قرآن و سنت خلاف نیں۔ سبھ توں زیادا خطرناک گل ایہ اے کہ کوئی بندا جعلی ڈگری راہیں میڈیکل دے شعبے یاں اوہدے نال جُڑے ہورشعبیاں وچ جائے۔ اوہناں دا کہنا سی کہ کوئی وی ملک جعلی ڈگری راہیں ترقی نہیں کر سکدا۔
