تہران(پاکستان پوائنٹ نیوز29۔دسمبر2016ء) پچھلے تن دِناں دے دوران ایران دیاں ہتھیار بند فوجاں نے امریکی جنگی تے ڈرون جہازاں نوں 12وار خبردار کردے ہوئے مشقاں والے علاقے توں دور رہن دا حکم دِتا اے۔ ایرانی ٹی وی دے مطابق ’آسمان ولایت سات‘ فوجی مشقاں دے ترجمان بریگیڈیئر عباس فروج پور نے دسیا کہ غیر ملکی جہاز تے ڈرون جہاز فوجی مشقاں بارے معلومات جمع کرن دی کوشش کر رہے نیں پر اوہناں نوں مشقاں والے علاقے توں دور رہن دا حکم دِتا گیا اے۔
اوہناں نے دسیا کہ پچھلے تن دِناں دے دوران کئی وار امریکی جنگی تے ڈرون جہازاں نوں ایرانی فوجی مشقاں والے علاقے دے نیڑے آن اُتے سختی نال خبردار کیتا گیا اے۔ ایرانی ہتھیار بند فوج دیاں’ آسمان ولایت سات‘ سانجھیاں مشقاں جنوبی، جنوب مغربی تے جنوب مشرقی ایران دے وڈے علاقے وچ جاری نیں۔ترجمان دے مطابق ایہناں مشقاں وچ ایرانی فوج دی وڈی گنتی حصہ لے رہی اے۔
