عراق وچ سینئر سوانی پرچا کار اغوا

8بندے دو گڈیاں وچ آئے ، گھر دی تلاشی لئی تے پرچاکار نوں نال لے گئے: پرچاکار تنظیم

عراق وچ سینئر سوانی پرچا کار اغوا
8بندے دو گڈیاں وچ آئے ، گھر دی تلاشی لئی تے پرچاکار نوں نال لے گئے: پرچاکار تنظیم

بغداد(پاکستان پوائنٹ نیوز28۔دسمبر2016ء) عراقی دارالحکومت بغداد وچ نامعلوم ہتھیار بند بندیاں نے اک سینئر سوانی پرچا کار نوں اغوا کر لیا۔ حکومت نے پرچا کار دی رہائی دی مہم شروع کردِتی۔ غیر ملکی خبر رساں ادارے دے مطابق عراق دی وزارت داخلا ولوں جاری اک بیان وچ آکھیا گیا اے کہ نامعلوم نقاب پوش بندے مشہور سوانی پرچا کار عفرہ شوقی المحمودی القیسی نوں اوہناں دے گھروں اغوا کر کے لئے گئے نیں۔

وزارت داخلا نے سوانی پرچا کار تے سرگرم سماجی کارکن دے اغوا دے حوالے نال ہور تفصیلاں نہیں دِتیاں۔ خبر رساں ایجنسی دے مطابق القیسی دا مکان بغداد شہر دے جنوب مغربی علاقے سیدیہ وچ اے، اوہ پرچا کار ہون دے نال نال عراقی وزارت ثقافت دی ملاز وی اے۔ القیسی عراق وچ کرپشن خلاف جاری مہم لئی وی سرگرم اے۔ سوانی پرچا کار دے اغوا اُتے سیاسی تجزیا کار آکھدے نیں کہ ایہ عراق دی انتہائی کمزور سکیورٹی صورتحال دا مونہ بولدا ثبوت وی اے۔

سوانی پرچا کار دے ساتھی تے بغداد وچ پرچاکارا ں دی تنظیم جرنلسٹک فریڈمز آبزرویٹری دے سربراہ زیاد عجیلی دا کہنا سی کہ 8نامعلوم ہتھیار بند بندے دو پک اپس اُتے آئے تے اوہ گھر دی تلاشی لین دے بعد القیسی نوں اپنے نال لے گئے۔ عجیلی دے مطابق ایہ لوک سکیورتی اداریاں دے اہلکار لگدے سن، عراقی وزیر اعظم حیدر العبادی نے سکیورٹی اداریاں نوں ہدایت کیتی اے کہ اوہ سوانی پرچا کار نوں فوری رہا کروان دی کوشش کرن۔ وزیر اعظم نے سیدیہ علاقے دے لوکاں توں وی اپیل کیتی اے کہ اوہناں کول جے ایس بارے کوئی معلومات ہووے تے اوہ سکیورٹی اہلکاراں نوں دین۔