سعودی عرب: 16ورھیاں دی کُڑی دا 70ورھیاں دے بابے نال ویاہ

تبوک(پاکستان پوائنٹ نیوز26۔دسمبر2016ء) سعودی عرب دے صوبے تبوک دے گورنر فہد بن سلمان نے اک 16ورھیاں دی کُڑی دا 70ورھیاں دے بابے نال ویاہ بارے تحقیقات دا حکم دِتا اے۔ غیر ملکی خبر رساں ادارے دے مطابق سوشل میڈیا اُتے پچھلے دِنا ای شہریاں ولوں ایس ویاہ اُتے تشویش دا وکھالا کیتا گیا اے، جہدے بعد گورنر نے اک عدالت نوں ایس معاملے دیاں تحقیقات لئی آکھیا اے۔ عدالت ایس معاملے دا جائزا لوے گی کہ کیہ ایہ ویاہ مذہبی لحاظ نال قبول جوگ اے یاں نہیں۔ متعلقا حکام نے دوویں فریقاں نوں سَد کے اوہناں دے بیان لئے نیں، اپنے بیان وچ کُڑی دا کہنا اے کہ اوہ اپنے ویاہ اُتے خش اے تے ایس ویاہ نوں چلانا چاہندی اے جدکہ اجے ایہ واضح نہیں اے کہ کُڑی دی رضا مندی دی صورت وچ عدالت کیہ فیصلا دیوے گی۔