دبئی(پاکستان پوائنٹ نیوز26۔دسمبر2016ء) متحدہ عرب امارات تے خاص کر سعودی عرب وچ موبائل فون دی بنیاد اُتے کئی طلاقاں ہوئیاں نیں۔ برطانوی تحقیقاتی ادارے دے مطابق ہر دس وچوں اک بیوی اپنے خاوند دا موبائل فون ضرور چیک کردی اے پر ہن دبئی دے اک مفتی اعظم نے فتوی جاری کیتا اے کہ خاوند دا موبائل فون چیک کرنا حرام اے۔ دبئی دے مفتی اعظم نے ایہ فتوی عجمان وچ رپورٹ ہون والے اک ایسے ای کیس دے بعد دِتا۔
غیر ملکی میڈیا دے مطابق عجمان وچ خاوند دا موبائل فون چیک کرن والی اک سوانی اُتے متحدہ عرب امارت دے آرٹیکل 212تے سائبر کرائم دی (کسے وی الیکٹرانک ڈیوائس، موبائل، کمپیوٹر، یاں لیپ ٹاپ نوں کسے دوجے بندے دی پرائیویسی وچ دخل دینا) شق دے تحت مقدما درج کیتا گیا سی جدکہ سائبر کرائم دا آرٹیکل 14کسے وی بندے دی الیکٹرانک ڈیوائس نوں کھولن والے پاس ورڈ کوڈ نوں حاصل کرن توں وی منع کردا اے، قانون دے تحت انج کرن والے نوں قید دے نال نال تن توں پنج لکھ درہم جرمانا وی کیتا جا سکدا اے۔
عجمان دے رہائشی اک بندے نے موبائل توں واٹس ایپ دے ذریعے اپنے موبائل اُتے تصویر گھلدے ہوئے رنگے ہتھیں پھڑ لیا سی جہدے بعد ذکر کیتے گئے بندے نے عجمان دے اک پولیس سٹیشن وچ اپنی بیوی خلاف مقدما درج کرودِتا۔
