واشنگٹن(پاکستان پوائنٹ نیوز10۔دسمبر2016ء) امریکا دی قومی سلامتی دی مشیر ڈاکٹر سوزان رائس نے آکھیا اے کہ خطے وچ امن لئی پاکستان دیاں کوششاں نوں سلاہندے آں، پاکستان دی خطے دے امن تے استحکام لئی کوششاں تحسین جوگ نیں، خاہش اے کہ پاکستان تے بھارت وچ مذاکرات دے ذریعے تعلقات بحال ہون۔ تفصیل دے مطابق وزیر اعظم دے اُچیچے معاون طارق فاطمی نے وائٹ ہاﺅس وچ امریکا دی قومی سلامتی دی مشیر سوزان رائس نال ملاقات کیتی۔
وزیر اعظم دے اُچیچے معاون طارق فاطمی دے نال امریکا وچ پاکستان دے سفیر جلیل عباس جیلانی وی موجود سن۔ ملاقات وچ دو پاسی دلچسپی دے امور، خطے وچ امن دے قیام تے سکیورٹی دی صورتحال، انسداد دہشت گردی، دفاع تے معاشی تعاون اُتے وچار وٹاندرا کیتا گیا۔ ایس موقعے اُتے وزیر اعظم دے اُچیچے معاون طارق فاطمی نے بھارتی فوجیاں ولوں ورکنگ باﺅنڈری تے لائن آف کنٹرول اُتے کیتیاںجان والیاں مسلسل خلاف ورزیاں دا معاملا وی چُکیا۔
طارق فاطمی نے سوزان رائس نوں کشمیر وچ انسانی حقاں دیاں خلاف ورزیاں بارے وی آگاہ کیتا۔ واشنگٹن وچ ہوئی ملاقات دوران طارق فاطمی نے سوزان رائس نوںد سیا کہ بھارتی جارحیت دے نتیجے وچ معصوم شہریاں دیاں شہادتاں ہو رہیاں نیں۔ سوزن رائس نے لائن آف کنٹرول اُتے کشیدگی بارے تشویش دا وکھالا کیتا۔ سوزن رائس نے آکھیا کہ امریکا پاکستان نال تعلقات نوں قدر دی اکھ نال ویکھدا اے۔
پاکستان دیاں خطے دے امن تے استحکام لئی کوششاں تحسین جوگ نیں۔ امریکا دے مشیر برائے قومی سلامی سوزان رائس نے ایل او سی اُتے کشیدا صورتحال بارے ڈاڈھے تحفظات دا وکھالا کرد ے ہوئے خطے وچ امن دے قیام لئی پاکستان دیاں کوششاں نوں سلاہیا۔ اوہناں نے آکھیا کہ امریکا دی خاہش اے کہ پاکستان تے بھارت مذاکرات دے ذریعے تعلقات بحال کرن۔ طارق فاطمی نے سوزان رائس نوں دہشت گردی خلاف جنگ وچ کامیابیاں توں وی آگاہ کیتا۔ طارق فاطمی دا کہنا سی کہ بھارتی فوجیاں دی انھے واہ فائرنگ دے نتیجے وچ معصوم لوک شہید ہو رہے نیں جدکہ مقبوضا کشمیر وچ وی بھارتی فوج ولوں انسانی حقاں دیاں خلاف ورزیاں کیتیاں جا رہیاں نیں۔
