واشنگٹن(پاکستان پوائنٹ نیوز10۔دسمبر2016ء) امریکی خفیہ ایجنسی سی آئی اے نے انکشاف کیتا ا ے کہ روس نے امریکی صدارتی انتخابات وچ مداخلت کر کے ڈونلڈ ٹرمپ نوں جتوایا جدکہ نویں چُنے گئے امریکی صدر ڈونلڈ ٹرمپ نے سی آئی اے دے انکشاف نوں رَد کرد ے ہوئے آکھیا اے کہ ایہ اوہو لوک نیں جو آکھدے سن کہ صدام حسین نے وڈے آنکڑیاں اُتے تباہی کِھلارن والے ہتھیار جمع کیتے ہوئے سن۔
امریکی رسالے واشنگٹن پوسٹ دے مطابق سی آئی اے ولوں امریکی حکام نوں دسیا گیا اے کہ ایہ بالکل واضح اے کہ نومبر وچ ہون والے صدارتی انتخابات وچ ڈونلڈ ٹرمپ نوں جتوانا روس دا پہلا مقصد سی۔ سی آئی اے دے مطابق روس نے امریکی انتخابات وچ مداخلت کر کے ڈونلڈ ٹرمپ نوں جتوان وچ اہم کردار ادا کیتا۔ امریکی صدر براک اوباما نے کانگریس ولوں الیکشن دے دوران روسی مداخلت دیاں تحقیقات دے ودھدے ہوئے مطالبے دے بعد پچھلے مہینے ہون والے صدارتی انتخابات دے دوران ہون والے سائبر حملیاں دیاں تحقیقات دا حکم دے دِتا۔
دوجے پاسے نویں چنے گئے امریکی صدر نے سی آئی اے ولوں اوہناں نوں جتوان لئی روسی مدد نوں رَد کر دِتا۔ ڈونلڈ ٹرمپ نے اپنے بیان وچ آکھیا کہ الیکشن جتوان وچ روسی مدد دی گل کرن والے اوہی لوک نیں آکھدے سن کہ صدام حسین نے وڈے آنکڑیاں اُتے تباہی کھلارن والے ہتھیار (ڈبلیو ایم ڈیز) جمع کیتے ہوئے سن۔ اوہناں دا کہنا سی کہ امریکی الیکشن دی تاریخ دی سبھ توں وڈی الیکٹورل کالج فتح نال بہت دیر پہلے ختم ہو چکے نیں ایس لئی امریکا نوں اک وار فیر عظیم بنان لئی اگے چلایا جائے۔
سائبر حملیاں دے حوالے نال ڈونلڈ ٹرمپ دا کہنا سی کہ ہیکنگ روس توں وی ہو سکدی اے، چین توں وی تے نیو جرسی وچ بِہ کے وی کوئی وی بندا ہیکنگ کر سکدا اے۔ یاد رہوے کہ پچھلے مہینے ہون والے امریکی صدارتی انتخابات وچ ری پبلکن امیدوار ڈونلڈ ٹرمپ نے ڈیموکریٹک امیدوار ہیلری نوں واضہ مارجن نال ہرایا سی جدکہ ڈونلڈ ٹرمپ دی کامیابی دے امریکا وچ وکھالے دا سلسلا وی شروع ہو گیا سی، ایس دوران وکھالویاں دا کہنا سی کہ معتصب بندا امریکا دا صدر نہیں ہو سکدا۔
