واشنگٹن(پاکستان پوائنٹ نیوز01۔دسمبر2016ء) امریکا نے جنرل قمر جاوید باجو نوں پاک فوج دا نواں سپہ سالار بنن اُتے مبارکباد دِتی۔ نائب ترجمان امریکی محکما خارجا مارک ٹونر نے امریکا ولوں جنرل قمر جاوید باجوہ نوں پاکستان دا نواں چیف بنن اُتے مبارکباد دین دے نال نال پاکستان وچ فوجی کمان دی تبدیلی دا خیرمقدم کیتا۔ تفصیل دے مطابق واشنگٹن وچ میڈیا بریفنگ دے دوران مارک ٹونر نے ہور آکھیا کہ دہشت گردی دے خاتمے لئی پاکستان نال رلکے کم کر رہے آں جدکہ پاکستان وی دہشت گردی دے خاتمے لئی تعاون کر رہیا اے۔
مارک ٹونر دا کہنا سی کہ پاکستان نے دہشت گرداں ہتھوں بہت نقصان چُکیا اے تے دہشت گردی دے خاتمے تیک پاکستان نال تعاون جاری رکھاں گے۔ اوہناں نے ہور آکھیا کہ پاکستان نوں دہشت گرداں ہتھوں ڈاڈھا نقصان ہویا۔ اوہناں دا کہنا سی کہ دہشت گرداں دیاں پناہ گاہواں لبھ کے اوہناں خلاف کارروائی کرنا پاکستان دے مفاد وچ اے۔
