واشنگٹن(پاکستان پوائنٹ نیوز23۔نومبر۔2016ء) امریکا نے پاک فوج دے سربراہ جنرل راحیل شریف نوں دہشت گردی خلاف جنگ وچ اہم تے قابل احترام شراکت دار قرار دیندے ہوئے اوہناں دے مستقبل لئی نیک خاہشاں دا اظہار کیتا۔ سفارتی وسیلیاں دے مطابق پاکستان وچ نویں آرمی چیف دی تقرری دے حوالے نال اعلان ہفتے دے دیہاڑے ہون دی امید اے۔ ریٹائر ہون والے آرمی چیف جنرل راحیل شریف دے حوالے نال سوال دا جواب دیندے ہوئے امریکی محکما خارجا دے ترجمان نے آکھیا کہ پاکستان دی فوج وچ ہون والی کوئی وی تبدلی اوہدا داخلی معاملا اے تے ایہ بہتر ہووے گا کہ ایس تبدیلی بارے بیان حکومت ولوں ای آئے۔
ترجمان دا کہنا سی کہ اسیں پاکستان وچ چیف آف آرمی سٹاف دی بدلی دے حوالے نال رپورٹاں توں واقف آں پر ایہ پاکستان دا اندرونی معاملا اے تے میں چاہواں گا کہ ہور معلومات لئی حکومت پاکستان نال رابطا کیتا جائے۔ امریکی محکما خارجا نے آکھیا اے کہ اسیں آئی ایس پی آر دے اوہناں بیاناں توں واقف آں جہناں وچ آکھیا گیا کہ جنرل راحیل شریف جلد اپنی تن سالہ مدت مکمل کرن والے نیں۔
بیان وچ ہور آکھیا گیا کہ جنرل راحیل شریف بطور آرمی چیف خطے وچ دہشت گردی خلاف جنگ وچ اہم تے قابل احترام شراکت دار رہے نیں، اسیں اوہناں تے اوہناں دے گھر والیاں نوں مبارک باد دیندے آں تے نیک خاہشاں دا اظہار کردے آں۔ یاد رہوے کہ آرمی چیف جنرل راحیل شریف نے 2014تے 2015وچ اپنے دورا واشنگٹن دے دوران دوبارا امریکی وزیر خارجا جان کیری نال ملاقات کیتی سی۔
پہلی ملاقات وچ جان کیری نے دہشت گردی خلاف جنگ وچ پاکستان دیاں کوششاں تے قربانیاں نوں سلاہیا سی جدکہ اوہناں نے پاک فوج دیاں پیشا وارانا صلاحتاں نوں وی سلاہیا سی۔ ملاقات وچ موجود امریکی نمائندا خصوصی برائے افغانستان و پاکستان ڈین فیلڈ مین نے وی دہشت گردی خلاف جنگ وچ جنرل راحیل شریف دے عزم دی تعریف کیتی سی۔ ڈین فیلڈ دا کہنا سی کہ واشنگٹن وچ موجود لوک سارے دہشت گرداں، سنے حقانی نیٹ ورک خلاف کارروائی لئی اوہناں دے عزم دے حامی نیں جدکہ امریکی وزیر خارجا جان کیری نے وی راحیل شریف نال دوجی ملاقات دے بعد اوہناں دیاں کوششاں نوں سلاہیا سی تے دہشت گردی خلاف جنگ وچ پاکستان دے کردار تے قربانیاں نوں منیا سی۔
