امریکا دے کئی کمپیوٹر ماہرین نے ہیلری نوں صداتی انتخاب دے نتیجے چیلنج کرن دا مشورا دے دے دتا

امریکا دے کئی کمپیوٹر ماہرین نے ہیلری نوں صداتی انتخاب دے نتیجے چیلنج کرن دا مشورا دے دے دتا

واشنگٹن(پاکستان پوائنٹ نیوز23۔نومبر۔2016ء) امریکا دے کئی کمپیوٹر ماہرین نے ہیلری کلنٹن نوں انتخابی مہم چلان والے گروپ نوں نتیجے چیلنج کردے ہوئے ووٹاں دی دوبارا گنتی دامطالبا کرن دا مشورا دے دِتا۔ امریکی ٹی وی سی این این دی رپورٹ دے مطابق کمپیوٹر ماہرین نے ہیلری دی مہم اُتے زور دِتا اے کہ اوہ ریاست وسکونسن، مشی گن تے پنسلوانیہ وچ ووٹاں دی دوبارا گنتی دی درخاست کر دین۔

کمپیوٹر ماہرین دا کہنا اے کہ اوہناں نوں ایس گل دے اشارے ملے نیں کہ ایہناں تن ریاستاں وچ ووٹاں دی گنتی اُتے اثر انداز ہون یاں سسٹم نوں ہیک کرن دی کوشش کیتی گئی۔ ماہرین نے اپنیاں تحقیقات ہیلری کلنٹن دے قریبی ساتھیاں نوں گھلیاں نیں۔ ایہناں ماہرین وچ یونیورسٹی آف مشی گن سینٹر برائے کمپیوٹر سکیورٹی اینڈ سوسائٹی دے ڈائریکٹر جے ایلکس ہیلڈر مین وی شامل نیں تے اوہناں نے ہیلری دے انتخابی کیمپ نوں ایس گل توں آگاہ کیتا کہ اوہناں دے خیال وچ ذکر کیتیاں گئیاں ریاستاں وچ پیپر بیلٹ یاں آپٹیکل سکیٹر دی بجائے الیکٹرانک ووٹنگ ہوئی جتھوں مشکوک طور اُتے ہیلری کلنٹن دی کارکردگی غیر متاثر کن رہی۔

ماہرین دے مطابق دے ایس گروپ نے ہیلری کلنٹن دی انتخابی مہم دے چیئرمین جان پوڈیسٹا تے قانونی مشیر مارک الیاس نوں اطلاع دِتی کہ جہڑیاں ریاستاں وچ الیکٹرانک ووٹنگ ہوئی اوتھے ہیلری کلنٹن نوں 7فیصد ووٹ ملے جدکہ ماہرین خدشا ظاہر کر رہے نیں کہ ایتھے ہیکنگ ہو سکدی اے۔ گروپ دا ایہ وی کہنا اے کہ اوہناں نوں ہیکنگ دے حوالے نال کوئی پکے ثبوت نہیں ملے پر جو پیٹرن ساہمنے آیا اے اوہنوں آزادانا طور اُتے ویکھن دی لوڑ اے۔

ایس حوالے نال ڈونلڈ ٹرمپ دی ٹیم ولوں کوئی ردعمل ساہمنے نہیں آیا۔ یاد رہوے کہ 8نومبر نوں ہون والے صدارتی انتخاب توں پہلے وی ہیکنگ دے خدشے ساہمنے آئے سن تے اوباما انتظامیا ولوں الزام لایا گیا سی کہ روس ووٹر رجسٹریشن ڈیٹا نوں ہیک کرن دی کوشش کر رہیا اے۔ بعد وچ انتخابی حکام تے سائبر سکیورٹی ماہرین نے ایس امکان نوں رَد کیتا سی کہ روس ہیکنگ دے ذریعے امریکی انتخاب دے نتیجیاں اُتے اثر اندز ہون دی صلاحیت نہیں رکھدااے۔

یاد رہوے کہ امریکی صدارتی انتخاب وچ غیر متوقع طور ری پبلکن پارٹی دے امیدوار ڈونلڈ ٹرمپ نے کامیابی حاصل کر کے پوری دنیا نوں حیران کر دِتا سی۔ اوہناں دی کامیابی دے بعد امریکا بھر وچ وکھالے شروع ہو گئے سن تے شہریاں دیاں وڈی گنتی نے ڈونلڈ ٹرمپ نوں اپنا صدر منن توں انکار کر دِتا سی جدکہ ڈونلڈ ٹرمپ صدر اوباما دی تھاں جنوری وچ اپنا عہدا سنبھالن گے۔