واشنگٹن(پاکستان پوائنٹ نیوز21۔نومبر۔2016ء) امریکا دے نویں چُنے گئے صدر ڈونلڈٹرمپ نے مسلماناں دی مشاورتی تنظیم بنان دا اعلان کر دِتا، تنظیم وچ سِر کڈھویں رہنما شامل کیتے جان گے، ایہ تنظیم امریکی حکومت نال رلکے کم کرے گی، ایس ضمن وچ مسلماناں دے خدشے وی دورے کیتے جان گے۔ غیر ملکی میڈیا دے مطابق نویں چُنے گئے صدر ڈونلڈ ٹرمپ نے مسلماناں دی مشاورتی تنظیم بنان دا اعلان کیتا اے۔
تنظیم وچ سِر کڈھویں مسلم رہنما شامل کیتے جان گے، ایہ تنظیم امریکی حکومت نال رلکے کم کرے گی۔ ڈونلڈ ٹرمپ بارے ایہ تاثر پایا جاندا اے کہ اوہ مسلماناں خلاف نیں، اوہناں دے کُجھ بیاناں نوں مسلم مخالف بیاناں دے طور اُتے شہرت ملی پر کامیابی دے بعد ہن اوہناں دی مسلماناں دے حوالے نال ترجیحاں آہستہ آہستہ ساہمنے آ رہیاں نیں۔ ڈونلڈ ٹرمپ نے مسلماناں دی اک ملک گیر تنظیم بنان دا فیصلا کیتا اے تے ایس سلسلے وچ اوہناں ولوں امریکا وچ وَسن والے سِر کڈھویں مسلمان رہنماواں نال رابطے کیتے جا رہے نیں۔
وائٹ ہاﺅس وچ حکومت ری پبلکن دی ہووے یاں ڈیموکریٹس دی، امریکا وچ وَسدے مسلماناں نوں نظر انداز کرنا مشکل اے، امریکا دے نویں صدر ولوں مسلماناں نوں اعتماد وچ لین تے مشاورتی عمل وچ رلت کرن نال جتھے امریکا دی سلامتی یقینی ہووے گی اوتھے مسلماناںوچ پائے جان والے خدشے وی دور ہون گے تے اوہ پہلے توں زیادا بہتر طریقے نال اپنے ملک دی خدمت کر سکن گے۔
