فلم ”اے دل ہے مشکل“ دا پہلا ٹریلا ساہمنے آ گیا، پاکستانی اداکار فواد خان وی ایس فلم وچ نظر آن گے

ممبئی(پاکستان پوائنٹ نیوز۔24ستمبر 2016) بالی ووڈ فلم ”اے دل ہے مشکل“ دی ریلیز دا انتظار چاہیواناں نوں لمے چِر توں سی تے ہُن ایہدا پہلا ٹریلا وی ساہمنے آ گیا اے۔فلم ”اے دل ہے مشکل“ وچ رنبیر کپور، انوشکا شرما تے ایشوریا رائے بچن مرکزی کرداراں وچ نظر آن گے جدکہ پاکستان دے کامیاب اداکار فواد خان ایس فلم وچ اک مختصر پر اہم کردار ادا کرن گے۔

فلم دے پہلے ٹریلر نوں ویکھ کے اندازا ہوندا اے کہ فواد خان نے ایس فلم وچ انوشکا شرما دے سابق عاشق دا کردار ادا کیتا اے جہنوں آن والے ویلے وچ انوشکا نے اپنی زندگی دی تباہی قرار دِتا۔ فلم وچ رنبیر کپور تے انوشکا بہترین دوست دے طور اُتے ساہمنے آئے پر ایشوریا رائے بچن نے اپنی خوبصورتی نال سبھ دے دل جِت لئے۔ فلم دے ٹریلر وچ ہور وکھایا گیا اے کہ رنبیر کپور اک وڈی عمر دی سوانی (ایشوریا) دی محبت وچ گرفتار ہو جاندا اے۔ فلم 28 اکتوبر نوں سینمیاں وچ وکھائی جائے گی۔