واشنگٹن(پاکستان پوائنٹ نیوز۔24ستمبر 2016) امریکی صدر اوباما نے سعودی حکومت خلاف سینیٹ تے کانگرس ولوں منظور کیتا جان والا بل ویٹو کر دِتا اے۔ امریکی کانگریس نے 9 ستمبر نوں متفقا طور اُتے ایس بل دی منظور دے دِتی سی جدکہ سینیٹ نے ایہ بل مئی وچ منظور کیتا سی۔ صدر براک اوباما نے آکھیا کہ ایہ بل امریکی مفاداں دے خلاف اے۔ اوہناں نے آکھیا کہ امریکی اتحادی، سعودی عرب 11ستمبر 2000 وچ امریکا اُتے ہون والے حملیاں وچ ملوث ہون دے الزاماں نوں رد کر چکیا اے۔
یاد رہوے کہ ایہ بل نائن الیون وچ ہلاک ہون والے امریکیاں نوں حق دیندا سی کہ اوہ زر تلافی لئی امریکی عدالتاں وچ سعودی حکومت خلاف مقدمے دائر کر سن تے ایہدے اُتے سعودی عرب نے دھمکی دِتی سی کہ جے انج ہویا تے اوہ اپنے ارباں ڈالر امریکی معیشت توں کڈھ لوے گاپر سینیٹرز دا کہنا اے کہ سعودی عرب دی ایہ دھمکی صرف لفظاں دی حد تیکر اے۔ صدر اوباما نے شروع وچ ای اشارا دِتا سی کہ جے ایہ بل منظور کیتا گیا تے سعودی عرب وچ وی ایس قسم دا قانون امریکی شہریاں خلاف منظور ہو سکدا اے۔ پر اپوزیشن دا کہنا اے کہ ایہ ٹھیک نہیں اے کیوں جے امریکا جے شدت پسنداں دی مالی مدد نہیں کردا تے ڈرن دی کوئی گل نہیں۔
