دبئی(پاکستان پوائنٹ نیوز16۔مئی2018ء ) دبئی وچ اک پاکستانی شہری نے اگ لگی کار وچوں ڈرائیو رنوں باہر کڈھ کے بچا لیا، جیہدے اُتے دبئی پولیس نے پاکستانی شہری نوں خراج تحسین پیش کیتا۔ تفصیل مطابق دبئی پولیس دے کمانڈر ان چیف میجر جنرل عبداللہ خلیفہ ال مری نے پاکستانی شہری نوں دبئی ہائی وے اُتے اک گڈی وچ لگی اگ وچ پھسے ہوئے بس ڈرائیور نوں بچان اُتے خراج تحسین پیش کیتا۔
مقامی وسیلیاں مطابق پاکستانی شہری حیات اللہ حبیب ہائی وے اُتے پانی دا ٹینک لے کے جا رہیا سی ،اوہنے ویکھیا کہ اک گڈی وچ اگ لگی ہوئی اے تے ڈرائیور گڈی وچ مدد لئی آوازاں دے رہیا اے۔ حیات اللہ نے چھیتی پانی دے ٹینک دی مدد نال اگ بجائی تے ڈرائیو ر نوں سڑن توں بچا لیا۔ ال مری نے مقامی میڈیا نال گل بات کردے ہوئے آکھیا کہ پاکستانی ڈرائیور حیات اللہ ولوں دوجیاں دی جان بچان دی ایس کوشش نوں سلاہن نال باقی لوکاں وچ وی دوجیاں دی مدد کرن دا جذبہ پیدا ہوئے گا۔
اوہناں نے ہور آکھیا کہ پاکستانی ڈرائیور دی اگ وچ کُد کے سڑی گڈی وچ موجود ڈرائیور دی جان بچان دا عمل تعریف دے قابل اے۔ ریسکیو تے ٹرانسپورٹ ڈیپارٹمنٹ دے جنرل ڈائریکٹر محمد احمد محفوظ اوس ویلے شیخ زید ہائی وے توں لنگھ رہے سن کہ اوہناں نے گڈی وچ اگ لگی ویکھی تے ڈرائیور نوں بچان لئی گڈی دا بوہا کھولن دی کوشش کیتی پر اوہ بوہا کھولن وچ ناکام رہے۔ عین اوس ویلے پاکستانی ڈرائیور حیات اللہ اگانہ ودھیا تے سارجنٹ نال رلکے ڈرائیور دی جان بچائی۔
