مقبوضہ کشمیر وچ نِکی بالڑی آصفہ نوں ہندوواں ولوں مندر وچ زیادتی دا نشانہ بنان مگروں قتل کر دتا گیا

سرینگر(پاکستان پوائنٹ نیوز12۔اپریل2018ء) مقبوضہ کشمیر وچ نِکی بالڑی آصفہ نوں ہندوواں ولوں مندر وچ زیادتی دا نشانہ بنان مگروں قتل کر دتا گیا۔ کشمیر میڈیا سروس مطابق آصفہ نوں ضلع کٹھوعہ دے علاقے ہیرانگر توں چالو ورھے دس جنوری نوں اغوا کیتا گیا سی جدکہ 17جنوری نوں اوہدی لاش پنڈ دیاں پیلیاں توں برآمد ہوئی سی۔ واقعے دیاں تحقیقات پولیس دی کرائم برانچ کر رہی اے جیہنے ہن تیکر دیپک کجھوریہ، وشال، سنجائی رام، سندر کمار، پرویس کمار تے سیندر کمار نوں مجرم قرار دتا اے، جیہناں دا تعلق بھارتی پولیس توں ای اے تے کرائم برانچ ولوں اوہناں خلاف چیف جوڈیشل مجسٹریٹ کٹھوعہ وچ چارج شیٹ پیش کیتے جان دی آس اے۔

کرائم برانچ دے اک افسر نے تصدیق کیتی اے کہ مجرماں خلاف چارج شیٹ آؤندے پیر یاں منگل نوں پیش کیتی جائے گی۔ چیتے رہوے کہ جمعوں کشمیر دیاں ہندو انتہا پسند تنظیماں ولوں مجرماں نوں بچان دیاں کوششاں کیتیاں جا رہیاں نیں مقبوضہ علاقے وچ قائم کٹھ پُتلی حکومت دی اتحادی تنظیم بھارتیہ جنتا پارٹی دے ناں نہاد وزیراں ولوں وی مجرماں نوں تحفظ دتا جا رہیا اے۔