ممبئی(پاکستان پوائنٹ نیوز27۔مارچ2018ء) بھارتی کمپنی نے اپنا اشتہار ایڈٹ کر کے چلوان والی پاکستانی کمپنی اُتے مقدمہ درج کروا دتا۔ میڈیا رپورٹس مطابق پی ایس ایل تھری دوران بار بار آن والے اشتہاراں وچ اک اشتہار پاکستانی کاسمیٹک کمپنی دا وی سی، ایس اشتہار نوں ویکھ کے بہت رولا پیا کہ آخر ایس کمپنی نے بالی ووڈ دی وڈی اداکارہ کرینہ کپور نوں برانڈ ایمبیسڈر کیویں بنا لیا۔
پاکستانی کاسمیٹک کمپنی `Olivia`نے اپنے اشتہار وچ کرینہ کپور نوں بطور برانڈ ایمبیسڈر ظاہر کروان دے نال نال `OlviaIntense`دے ناں توں اپنا نواں ہیئر ٹریٹمنٹ وی متعارف کروایا۔ پر ہن ایہ گل ساہمنے آئی اے کہ ایہ اشتہار بھارتی کمپنی `BBlunt`دے اشتہار دی نقل اے یاں ایہ آکھیا جائے کہ پاکستانی کمپنی نے ایس اشتہار نوں ایڈٹ کر کے چلایا تے گاہکاں نوں دھوکھا دتا تے ایہ گل غلط نہیں ہوئے گی۔
ایس اشتہار نوں سبھ توں پہلاں Campaign Indiaنامی اک اشتہاری کمپنی نے نوٹس کیتا۔ دوویں اشتہاراں نوں ویکھ کے صاف نظر آؤندا اے کہ ایہ دوویں اشتہار اک ای نیں جدکہ ایہناں وچ صرف پراڈکٹ دا فرق اے جیہنوں فوٹو شاپ راہیں ایڈٹ کیتا گیا اے۔ بھارتی کمپنی نے پاکستانی کمپنی دی ایس حرکت اُتے دُکھ دا اظہار کردے ہوئے اوہدی نندیا کیتی اے۔ اوہناں دا کہنا سی کہ اسیں پاکستانی کمپنی خلاف ایکشن لواں گے۔
