نویں دِلی(پاکستان پوائنٹ نیوز12۔ستمبر2016ء) بھارت دے مشہور کامیڈین اداکار کپل شرما خلاف ایف آئی آر درج کرن دیاں تیاریاں کیتیاں جا رہیاں نیں۔ تفصیل دے مطابق پچھلے ہفتے کپل شرما نے بی ایم سی وچ رشوت بارے مائیکرو بلاگنگ ویب سائٹ اُتے ٹویٹر اُتے اک ٹویٹ کیتا سی جہدے وچ اوہناں نے بھارتی وزیر اعظم نریندر مودی دی توجہ ایس پاسے دوائی سی، پر ٹویٹ دے بعد بھارتی ریاست مہار اشٹرا دے وزیر اعلا نے معاملے دا نوٹس لیندے ہوئے کپل شرما نوں یقین دوایا سی کہ اوہ ایس معاملے وچ اوہناں دی مدد کرن گے پر ہن ایہ خبر آ رہی اے کہ کپل شرما دیاں اوکڑاں آسان ہون دی بجائے اوہناں وچ وادھا ہون لگا اے۔
بھارتی میڈیا رپورٹ دے مطابق کپل شرما نے اپنے فلیٹ وچ غیر قانونی تعمیر کروائی اے۔ جہدے اُتے اک بندے نے کپل شرما خلاف مہارا شٹرا ریجنل ٹاؤن پلاننگ ایکٹ 1966 دے تحت شکایت درج کروائی۔ ایس ضمن وچ کپل شرما نوں دو وار نوٹس جاری کیتے گئے نیں۔ جہدے جواب وچ کپل شرمامقامی انتظامیا نوں مطمئن نہیں کر سکے۔ ایس ساری صورتحال دے بعد پولیس نے کپل شرما خلاف ایف آئی آر درج کرنا دا فیصلا کیتا اے۔
