مکہ مکرمہ(پاکستان پوائنٹ نیوز10۔ستمبر2016ء) اللہ دے حضور حج دی سعادت حاصل کرن لئی مناسک حج دا آغاز ہفتے دے دیہاڑے ہو گیا اے جہدے لئی منی دے مقام اُتے سبھ توں وڈی خیمہ وستی وی آباد ہو گئی اے۔ ہر سال دی طرحاں چالو ورھے وی لکھاں دی گنتی وچ مسلمان اپنے رب دے حضور پیش ہو کے حج دی سعادت حاصل کرن گے۔ تفصیل دے مطابق حج بیت اللہ دا آغاز منی توں ہو گیا جتھے عازمین لبیک اللھم لبیک دیاں آوازاں اُچیاں کردے ہوئے منی وچ اپنی عارضی خیمہ وستی آباد کر رہے نیں۔
8 ذی الحج نوں منی وچ 5 نمازاں پڑھنا سنت اے،رات بھر منی وچ عبادت دے بعد عازمین حج عرفات دے میدان ول جان گے، جتھے رکن اعظم وقوف عرفہ ادا کیتا جائے گا۔ جتھے سعودی حکومت نے عازمین حج نوں ساریاں سہولتاں فراہم کرن لئی انتظامات مکمل کر لئے نیں۔ پاکستان حج مشن وکوں مکہ وچ پاکستانی حاجیاں دی مدد، اوہناں دی رہنمائی تے فلاح و بہبود لئی 1600 اہلکاراں اُتے مشتمل عملا تعینات کر دِتا گیا اے۔ ایس توں وکھ وزارت صحت نے حاجیاں نوں فوری ڈاکٹری امداد دین لئی ہیلپ لائن وی قائم کر دِتی اے، جہدا نمبر 937 اے۔ عازمین حج کسے ایمرجنسی دی صورت وچ اپنے موبائل توں کال یاں ایس ایم ایس کر کے ایس ہیلپ لائن توں مدد لے سکدے نیں۔
