نویں دِلی(پاکستان پوائنٹ نیوز30۔دسمبر2017ء) بھارتی میڈیا نے انکشاف کیتا اے کہ ہر سال اک ہزار چھ سو بھارتی فوجی اپنے ای ہتھاں نال زندگی ختم کر لیندے نیں، پچھلے 9ورھیاں دوران اک ہزار 22فوجیاں نے خدکشی کیتی۔ بھارتی اخبار ’ٹائمز آف انڈیا‘ دی رپورٹ وچ آکھیا گیا اے کہ بھارت وچ ہر سال 1600فوجی جوان جنگ دے بغیر ای مارے جاندے نیں، ورکنگ باؤنڈری تے لائن آف کنٹرول اُتے تعینات بھارتی فوجی دستے حوصلے ہار دے جا رہے نیں۔
بھارتی اخبار وچ خدکشیاں دی وجہ مقبوضہ جمعوں کشمیر وچ بھارتی فوجیاں دیاں موتاں، ریاستی طاقت دے استعمال مگروں کشمیر وچ ناکامی دے نال نال ڈاڈھی مزاحمت نوں قرار دتا گیا اے جدکہ سرحدی علاقیاں وچ تعینات فوجیاں نوں صرف دو فیصد الاؤنس ملنا، گھروں دوری، فوجی افسراں دا جواناں نال مَندا رویہ تے چھٹیاں دیاں درخاستاں دا رد ہونا وی بھارتی فوجیاں دا حوصلہ گھٹا رہیا اے۔
دوجے پاسے بھارتی وزیر مملکت برائے دفاع سبھاش بھامر ولوں پارلیمنٹ وچ پیش کیتی جان والی رپورٹ مطابق 2009توں ہن تیکر 9ورھیاں وچ اک ہزار 22بھارتی فوجیاں نے خدکشی کیتی، 2014توں 2017دوران 425جدکہ 2009توں 2013دوران 597فوجیاں نے زندگی دا خاتمہ کیتا۔ پچھلے چار ورھیاں دوران فوج دے نو افسراں تے 26اہلکاراں نے خدکشی کیتی، سبھ توں گھٹ خدکشی دے واقعات بحریہ وچ ویکھن نوں ملے جتھے دو افسراں تے 16سیلرز نے اپنی زندگی دا خاتمہ کیتا۔
