واشنگٹن(پاکستان پوائنٹ نیوز30۔دسمبر2017ء) امریکی حکومت نے پاکستان دی 255ملین ڈالر فوجی امداد روکن بارے غور شروع کر دتا اے۔ امریکی اخبار ’نیویارک ٹائمز‘ دی رپورٹ مطابق ڈونلڈ ٹرمپ انتظامیہ سختی نال پاکستان دی 25کروڑ 50لکھ ڈالر دی امداد روکن بارے غور کر رہی اے۔ اخبار مطابق چالو ورھے اکتوبر وچ پاکستانی فورسز نے کارروائی کردے ہوئے دہشت گرداں دی قید وچ موجود کینیڈین شہری جوشوا بوئل تے اوہدی امریکی بیوی کینلان کولمین نوں بالاں سنے رہا کروایا سی۔
ایس امریکی کینیڈین خاندان دی رہائی دوران اک اغوا کار وی پھڑیا گیا سی جہدا تعلق حقانی نیٹ ورک توں اے۔ امریکا دا خیال اے کہ گرفتار اغوا کار کول طالبان دی قید وچ موجود اک امریکی مغوی کیون کنگ بارے وی معلومات ہو سکدیاں نیں۔ امریکی حکام نے پاکستان وچ گرفتار ایس اغوا کار تیکر اپڑائی منگی پر پاکستانی حکام نے منع کر دتا، جہدے اُتے مایوس ہو کے ٹرمپ انتظامیہ نے 255ملین ڈالر دی قسط روکن بارے غور شروع کر دتا اے۔یاد رہوے کہ ایس قسط دی ادائیگی وچ پہلاں ای امریکا کویل کر چکیا اے۔
