نیویارک(پاکستان پوائنٹ نیوز27۔اگست 2016ء) بھارتی وزیر اعظم نریندر مودی دی بلوچستان دے حوالے نال تقریر دی اندرلی کہانی سامنے آ گئی اے۔ اک بھارتی اخبار نے انکشاف کردے ہوئے آکھیا اے کہ بلوچستان بارے تقریر پِچھے داخلا وزیر راج ناتھ سنگھ تے دفاع وزیر منوہر پاریکر دا دباؤ سی ایہناں دوواں انتہا پسند وزیراں نے مودی نوں مجبور کردے ہوئے آکھیاکہ کشمیر دے مسئلے اُتے پاکستان نے اک وار فیر اقوام متحدہ دا بوہا کھڑکایا اے ایس لئی پاکستان نوں سبق چکھان لئی بھارت نوں بلوچستان دے حوالے نال کُھل کے اپنی پالیسی بیان کر دینی چاہیدی۔
رپورٹ وچ ایہ وی آکھیا گیا اے کہ نریندر مودی نوں کئی سینئر بیورو کریٹس نے مشورا دتا سی کہ بھارت دے آزادی دیہاڑ دی تقریب وچ تُسیں بلوچستان دا ذکر نہ کرنا کیوں جے ایہدے نال دوویں ملکاں دے تعلقات ہور خراب ہون گے۔ رپورٹ دے مطابق نریندر مودی دی تقریر دے حوالے نال بھارتی خارجا وزارت نے کسی قسم دا تبصرہ کرن توں انکار کیتا اے۔
