گھٹمنڈو(پاکستان پوائنٹ نیوز26۔اگست 2016ء) نیپال دے مشرقی پہاڑی علاقے وچ مسافر بس دریا وچ ڈِگن نال 21 بندے ہلاک ہو گئے۔ رپورٹ دے مطابق مسافراں نال بھری بس چاندنی بجینگ نامی پنڈ جا رہی سی، ایس دوران بس ڈرائیور توں بے قابو ہو گئی تے دریائے ترشولی وچ جا پئی۔ حادثے دے بعد امدادی ٹیماں نے موقع اُتے پہنچ کے ریسکیو کم شروع کیتا، ایس دوران لاشاں تے زخمیاں نوں بس توں باہر کڈھیا گیا۔
مقامی ضلع سربراہ بینود پرکاش سنگھ نے دسیا کہ ایس حادثے وچ 21 بندے ہلاک ہو گئے نیں جدکہ 16 زخمیاں نوں ڈاکٹری امداد لئی مقامی ہسپتال منتقل کیتا گیا۔ اوہناں دا ہور کہنا سی کہ امدادی کارکناں نے بس وچ پھسے مسافراں نوں کڈھن دا کم فوری طور اُتے شروع کر دِتا سی۔ بینود پرکاش سنگھ نے دسیا کہ امدادی سرگرمیاں وچ کوشش کیتی گئی کہ زیادہ توں زیادہ بندے پانی وچ ڈبئی ہوئی بس توں کڈھ کے اوہناں دی جان بچائی جاسکے، ایسے پاروں کئی بندیاں نوں بچان وچ کامیابی ملی۔یاد رہوے کہ چالو مہینے اک ہور حادثے دے نتیجے وچ 33 بندے ہلاک جدکہ کئی زخمی ہو گئے سن۔
