جے پور(پاکستان پوائنٹ نیوز10-۔اکتوبر2017ء) بھارتی ریاست راجھستان دے شہر جے پور وچ آشنا نال رلکے اپنے خاوند سنے 3بالاں نوں ذبح کرن والی سوانی نوں گرفتارکر لیا گیااے۔ تفصیل مطابق 1999وچ سنتوش دا ویاہ اپنے توں دس ورھے وڈے بنواری شرما نال ہویا۔ ویلا دے نال نال اوہناں دے تن بال ہو گئے۔ پر سنتوش اپنے خاوند بنواری شرما دے سلوک توں خش نہیں سی۔ بنواری شرما اپنے توں دس ورھے نِکی بیوی نال محبت جتان دی بجائے اپنے کم وچ لگا رہندا جدکہ سنتوش دا سارا ویلا اپنے خاوند دی راہ تکدے لنگھ جاندا۔
سنتوش نے اپنا ویلا چنگا لنگھان لئی تائی کوانڈو دیاں کلاساں وچ رلت شروع کرد تی۔ اوتھے سنتوش دی ملاقات ہنومان پرساد نال ہوئی۔ ویلا بیتن دے نال راہ و رسم محبت وچ بدل گیا۔ ایس گل دا پتا جدوں سنتوش دے گھر والے نوں ہویا تے اوہنے ہنومان نال سنتوش نوں ملن توں منع کیتا۔ پر سنتوشن تے ہنو مان باز نہ آئے جہدے کارن حالات خراب ہو گئے۔ آخیر سنتوش نے اپنے خاوند تے بالاں نوں راہ توں ہٹان لئی ہنومان نال رلکے منصوبہ بندی کیتی تے کرائے دے دو قاتلاں ہتھوں بالاں تے خاوند نوں ذبح کر وا دتا۔ قتل دی واردات مگروں سنتوش نے قاتلاں نوں 6ہزار نقد تے گھر وچ کھلوتی سکوٹی دتی۔ پر بعدوں پولیس نے ایس مسئلے نوں حل کردے ہوئے سنتوش‘ ہنو مان تے کرائے دے قاتلاں نوں گرفتار کر لیا۔
