ریاض(پاکستان پوائنٹ نیوز28۔ستمبر2017ء) مقامی اخبار ’اُردو نیوز‘ مطابق خادم حرمین شریفین شاہ سلمان بن عبدالعزیز ولوں سوانیاں نوں ڈرائیونگ لائسنس جاری کرن دی منظوری مگروں مقامی‘ علاقائی تے قومانتری خبر رساں اداریاں دی توجہ دے مرکز سوانیاں تے ڈرائیونگ لائسنس بن گئے۔ خبر رساں اداریاں نے تواریخ دیاں پہلیاں ڈرائیونگ لائسنس لین والیاں 8عرب سوانیاں دے ناواں بارے کھوج لائی اے۔
کھوج مطابق پہلا ڈرائیونگ لائسنس اک مصری سوانی نے لیا۔ دسیا گیا اے کہ 1920وچ عباسیہ احمد فرغلی نے ہن توں 97سال پہلاں ڈرائیونگ لائسنس لیا سی۔ ایہ پہلی عرب سوانی سی جہنے ڈرائیونگ لائسنس لیا۔ خلیج دے علاقے وچ بحرین دی فاطمہ الزیانی نوں 1945وچ منامہ وچ کار چلاندے ہوئے ویکھیا گیا سی۔کئی لوکاں دا دعوا اے کہ لبنان دی سلوی العمران اوہ پہلی سوانی اے جہنے بحرین وچ گڈی چلائی سی۔ ایہ واقعہ 1954دا دسیا جاندا اے۔ عراق وچ امینہ علی صاحب نے 1936تے سوڈان وچ آمنہ عطیہ نے 1945‘ امارات دی موزہ نے 1976تے کویت دی شیخہ بدریہ سعود الصباح نے پہلی وارڈرائیونگ لائسنس لیا۔
