ریاض(پاکستان پوائنٹ نیوز30۔جون2017ء) سعودی حکام دا کہنا اے کہ سابق ولی عہد محمد بن نایف نظر بند نہیں نیں۔ غیر ملکی میڈیا مطابق اک سینئر سعودی عہدے دار نے جمعرات نوں نیو یارک ٹائمز دی ایس خبر نوں رد کر دتا اے، جہدے وچ آکھیا گیا سی کہ شہزادہ محمد بن نایف نوں اوہناں دے محل وچ نظر بند کر دتا گیا اے تے اوہناں دے باہرلے ملک جان اُتے وی پابندی لا دتی گئی اے۔
چیتے رہوے کہ پچھلے ہفتے سعودی شاہ سلمان بن عبدالعزیز نے اپنے بھتیجے محمد بن نایف دی تھاں اپنے پُتر محمد بن سلمان نوں اپنا جانشین متھیا سی۔ سعودی حکام نے دسیا کہ سابق ولی عہد تے سابق وزیر داخلا محمد بن نایف پروہنیاں نال ملاقات کر رہے نیں ۔ سعودی حکام دا کہنا اے کہ محمد بن نایف تے اوہناں دے خاندان دے کسے فرد دی آوا جاوی اُتے کوئی پابندی نہیں لائی گی۔
