دوحا(پاکستان پوائنٹ نیوز30۔جون2017ء) قطر نے آکھیا اے کہ اوہ علاقائی بحران دے خاتمے لئی عرب ریاستاں نال جائز امور اُتے گل بات لئی تیار اے پر پچھلے ہفتے پیش کیتے گئے مطالبیاں دی فہرست وچ کئی ملکاں نوں پورا کرنا ایس لئی ممکن نہیں اے کیونکہ اوہ مطالبے جائز نہیں نیں۔ میڈیا رپورٹس مطابق قطری وزیر خارجا شیخ محمد بن عبدالرحمان آل ثانی نے اک بیان وچ آکھیا کہ عرب ملکاں ولوں پیش کیتے گئے مطالبے معقول نہیں نیں پر اسیں ناں نہاد داعش، القاعدہ تے لبنانی شیعہ ملیشیا حزب اللہ نال تعلقات نہیں توڑ سکدے کیونکہ اجیہے تعلقات دا تے کوئی وجود نہیں اے۔
اوہناں دا کہنا سی کہ اسیں ایرانی پاسداران انقلاب دے کسے رکن نوں وی قطر توں بے دخل نہیں کر سکدے کیونکہ انج دا کوئی ایرانی ساڈے ملک اندر نہیں اے۔ شیخ محمد نے آکھیا کہ دوحا لئی اوہ کم کرنا ناممکن اے جو اوہ کدی کردا ای نہیں رہیا۔ اوہناں دا کہنا سی کہ اسیں ایس نتیجے اُتے پہنچے آں کہ عرب ملکاں ولوں دتے گئے الٹی میٹم دا مقصد فہرست وچ پیش کیتے گئے ایشوز نوں حل کرنا نہیں سی بلکہ قطر اُتے دباءپانا سی پر اسیں کدی وی ایہ کم نہیں کراں گے۔
سعودی عرب، مصر، بحرین تے متحدہ عرب امارات نے تیرھاں نکات اُتے مشتمل مطالبیاں دی اک فہرست قطر نوں گھلی اے۔ ایہدے وچ ایہ مطالبا کیتا گیا اے کہ اوہ مداخلت اُتے مبنی اپنی جارحانا پالیسی دا خاتما کردیوے۔ اخوان المسلمین سنے انتہا پسند تے دہشت گرد عناصر دی حمایت توں پچھانہ ہٹ جائے۔ ایہناں مطالبیاں نوں پورا کرن لئی تن جون دی ڈیڈ لائن دتی گئی اے۔
