نویں دِلی(پاکستان پوائنٹ نیوز02۔جون2017ء) بھارت نے زمین توں زمین اُتے مار کرن والے میزائل ’پرتھوں ٹو‘ دا کامیاب تجربا کرن دادعوا کر دتا۔ میزائل نوں اڑیسہ دے ٹیسٹ رینج توں فائر کیتا گیا سی۔ حکام مطابق میزائل دا تجربا جمعے دی سویر 9وجکے 50منٹ اُتے انٹیگریٹڈ ٹیسٹ رینج (آئی ٹی آر) وچ چاندی پور نیڑے کیتا گیا سی۔ بھارتی حکام مطابق میزائل نے 350کلومیٹر دا پینڈا طے کر کے اپنے ٹارگٹ نوں خلیج بنگال وچ نشانا بنایا۔
رپورٹ وچ حکام دے حوالے نال دعوا کیتا گیا کہ میزائل نے کامیابی نال اپنے ٹارگٹ نوں نشانا بنایا۔ ذکر کیتا گیا میزائل 500توں 1000کلو گرام جوہری وار ہیڈ لیجان دی صلاحیت رکھدا اے۔ میزائل دے حوالے نال دعوا کیتا گیا کہ ایہدے وچ جدید نظام لایا گیا اے جو اپنے ٹارگٹ نوں چنگے طریقے نال نشانا بنان دی صلاحیت رکھدا اے۔ بھارتی ادارے ڈیفنس ریسرچ اینڈ ڈویلپمنٹ آرگنائزیشن (ڈی آر ڈی او) دے سائنس داناں دا کہنا سی کہ ملکی سطح اُتے تیار کیتے جان والے میزائل دا تجربا سٹرٹیجک فورس کمانڈر (ایس ایف سی) ولوں کیتا گیا جہدی نگرانی ڈی آر ڈی او نے کیتی۔
رپورٹ وچ آکھیا گیا اے کہ ایس توں پہلے 21نومبر 2016نوں ’پرتھوی ٹو‘ میزائلز دے کامیاب تجربے کیتے گئے سن۔ بھارتی فورسز ولوں 2003وچ متعارف کرائے گئے 9میٹر لمی تے مائع ایندھن نال چلن والے میزائل نوں پہلی وار آر ڈی او نے انٹیگریٹڈ میزائل ترقیاتی پروگرام دے تحت تیار کیتا گیا سی۔
