نیویارک(پاکستان پوائنٹ نیوز31۔مئی2017ء) امریکی کھوجکاراں دا کہنا اے کہ برصغیر دیاں دو ایٹمی طاقتاں وچکار جاری سیاسی سفارتی تے سرحدی کشیدگی جے اللہ نہ کرے جنگ وچ بدل گئی تے اک وڈی تباہی ہو وے گی۔ دوویں ملکاں دے ایٹمی ہتھیاراں نال کروڑاں لوک موت دے مونہ وچ چلے جان گے اوزن لیئر دا ادھا حصہ برباد ہو جائے گی۔ بھارتی میڈیا دی رپورٹ مطابق امریکی محققاں دا کہنا اے کہ جے بھارت تے پاکستان وچکار جنگ ہوندی اے تے نقصان اندازے توں وی ودھ ہووے گا تے ایہ نقصان صرف پاکستان تے بھارت تیک محدود نہیں ہووے گا بلکہ 21ملین لوک حملے مگروں اک ہفتے اندر موت دے مونہ وچ چلے جان گے جو جنگ عظیم 2دے دوران مرن والیاں دی گنتی توں ودھ ہووے گی، ایہ ریسرچ یونیورسٹی آف کولریڈ بولڈر تے یونیورسٹی آف کیلی فورنیا دے محققاں نے پیش کیتی اے۔
جنگ دے نتیجے وچ دنیا بھر دے دو بلین لوک بھکھ تے قحط دا شکار بن سکدے نیں ۔کھوجکاراں مطابق پاکستان وچ ایس ویلے 130دے لگ بھگ ایٹمی وار ہیڈ نیں جدکہ انڈیا کول ایٹمی وار ہیڈ دی گنتی 120دے نیڑے اے، ایٹمی جنگ بارے گل بات اوڑی وچ ہون والے حملے مگروں شروع ہوئی جہدے وچ 19بھارتی فوجی ہلاک ہوئے سن تے بھارت نے حملے دا الزام پاکستان اُتے لا دتا سی۔
