لندن(پاکستان پوائنٹ نیوز04۔مئی2017ء) برطانوی شاہی محل ’بکنگھم پیلس‘ دے عہدیداراں نے ملکہ برطانیا تے اوہناں دے خاوند دی صحت بارے اُڈن والیاں خبراں نوں رد کرد ے ہوئے آکھیا اے کہ ایس حوالے نال تشویش دی کوئی گل نہیں۔ بکنگھم پیلس دے عہدیداراں نے دسیا کہ شاہی محل دے عملے دا اک اجلاس سدیا گیا اے پر کسے قسم دی تشویش دی کوئی وجہ نہیں۔ شاہی محل دے اک عہدیدار نے افواہواں نوں رد کر دتا تے آکھیا کہ ملکہ برطانیا نے شاہی محل وچ برطانوی وزیر اعظم تھریسامے نال ملاقات کیتی جدکہ پرنس فلپ وی لندن کرکٹ کلب گئے۔
ذکر کیتے گئے عہدیدار نے ناں ظاہر نہ کرن دی شرط اُتے دسیا کہ شاہی محل دے عملے دے اجلاس اکثر بُلائے جاندے نیں۔ چالو ورھے فروری وچ ای دنیا دی سبھ توں وڈیری شاہی سربراہ دوجی ملکہ برطانیا الزبتھ نے شاہی سربراہی دے 65ورھے پورے کیتے سن۔ ملکہ الزبتھ ستمبر 2015وچ ملکہ وکٹوریہ نوں پچھے چھڈ کے برطانیا دی تواریخ دی سبھ توں لَمے چِر تائیں سربراہی کرن والی شخصیت بن گئی اے۔ جنوری 2015وچ سعودی عرب دے فرمانروا شاہ عبداللہ بن عبدالعزیز دی وفات مگروں ملکہ برطانیا کسے وی شاہی خاندان دی سبھ توں وڈیری سربراہ وی اے۔
