کویت سٹی(پاکستان پوائنٹ نیوز07۔مارچ2017ء) کویت نے 6سال توں پاسکتانیاں اُتے لائی گئی ویزا پابندی ختم کرن دا اعلان کر دِتا، پاکستان تے کویت نے جوائنٹ بزنس کونسل بنان اُتے وی اتفاق کر لیا اے۔ تفصیل دے مطابق وزیر اعظم میاں محمد نواز شریف تے امیر کویت وچکار اج ملاقات ہوئی، ملاقات دوران باہمی دلچسپی دے امور تے دو پاسی تعلقات بارے وچار وٹاندرا کیتا گیا۔
ایس موقعے اُتے وزیر اعظم میاں محمد نواز شریف نے امیر کویت نال ملاقات وچ کویت وچ پاکستانیاں نوں پیش اوکڑاں دے حل دی وی پیشکش کیتی۔ جہدے اُتے امیر کویت نے پاکستانیاں دے مسائل حل کرن دی یقین دہانی کروائی۔ وزیر اعظم نواز شریف تے امیر کویت وچکار ملاقات دوران کویت نے 6سال توں پاکستانیاں اُتے لائی گئی ویزا پابندی ختم کرن دا اعلان وی کیتا جدکہ پاکستان تے کویت نے سرمایا کاری لئی 5مختلف شعبیاں وچ تعاون اُتے اتفاق وی کیتا اے۔ یاد رہوے کہ وزیر اعظم میاں محمد نواز شریف کویت دے سرکاری دورے اُتے گئے ہوئے نیں۔
