لندن(پاکستان پوائنٹ نیوز04۔مارچ2017ء) ملکہ برطانیا عوامی تھاں یاں کسے تقریب اندر اپنے ہینڈ بیگ دے بغیر رلت نہیں کردیاں، اوہ بیگ وچ نہ صرف ضروری شیواں رکھدیاں نیں بلکہ اپنے سٹاف نوں خفیہ پیغام وی دیندیاں نیں۔ میڈیا رپورٹس دے مطابق ملکہ برطانیا جدوں وی محل توں نکلدیاں نیں، شان نال نکلدیاں نیں تے اپنا ہینڈ بیگ لینا نہیں بھلدیاں کیونکہ ایہ صرف بیگ نہیں بلکہ ملکہ دے سٹاف نوں خفیہ پیغام گھلن د اآسرا وی اے۔
شاہی مورخ نے انکشاف کیتا اے کہ عوامی تھاں یاں مجمعے وچ ملکہ جے اپنا بیگ اک ہتھ چوں دوجے وچ پھڑے تے ایہدا مطلب ہوندا اے کہ ملک گل بات ختم کر چکیاں نیں، جے اوہ اپنا ہینڈ بیگ میز اُتے رکھ دین تے ایہدا مطلب ہوندا اے کہ اوہ واپس جان لئی تیار نیں پر جے ملکہ اپنی ویاہ والی مُندری گھمان لگن تے سمجھ جاﺅ کہ اوہ ایسے ویلے اوس تھاں توں جانا چاہندیاں نیں۔ ملکہ عام طور اُتے بیگ اپنے کھبے ہتھ وچ رکھدیاں نیں تاں جے سَجھا ہتھ ملا سکن، اوہ مخصوص برانڈ دے ہینڈ بیگز ورتدیاں نیں، جہدی ورتوں اوہناں نے 1968توں شروع کیتی۔ آکھیا جاندا اے کہ ملکہ کول ایس برانڈ دے 2سو توں ودھ ہینڈ بیگز نیں، ایہناں ہینڈ بیگز وچ ملکہ دی عینک، فاون پین، ٹافیاں، 5تے 10پاﺅنڈ دے نوٹ ہوندے نیں۔
