پجنگ(پاکستان پوائنٹ نیوز25۔فروری2017ء) چین نے پاک فوج ولوں شروع کیتے جان والے نویں آپریشن ’ردالفساد‘ دی حمایت دا اعلان کردے ہوئے آکھیا اے کہ ایس آپریشن نال ملک بھر وچ موجود دہشت گردی تے انتہا پسندی نوں ختم کرن وچ مدد ملے گی۔ چین دی وزارت خارجا دے ترجمان گنگ شانگ نے میڈیا بریفنگ دے دوران ’ردالفساد‘ اُتے تبصرا کردے ہوئے آکھیا کہ چین پاکستان ولوں اپنی اندرونی سکیورٹی نوں یقینی بنان، استحکام لیان تے اپنے شہریاں دی حفاظت نوں یقینی بنان لئی دہشت گردی خلاف شروع کیتے گئے آپریشن دی حمایت کردا اے۔
گنگ شانگ دے مطابق پچھلے کُجھ ورھیاں توں پاکستان نے دہشت گردی دا ساہمنا کرن لئی سخت فیصلےاں دے نتیجے وچ کامیابی حاصل کیتی۔ ایس موقعے اُتے چینی وزارت خارجا دے ترجمان نے پاکستان وچ دہشت گردی دی نویں لہر وچ معصوم لوکاں دیاںموتاں اُتے ہرکھ دا وکھالا کیتا۔ اوہناں نے فوجی آپریشن دا ذکر کردے ہوئے آکھیا کہ چین نوں یقین اے کہ پاکستانی حکومت، فوج تے لوکائی ولوں دہشت گردی خلاف سانجھیاں کوششاں دے نتیجے وچ اک دن اوہ دہشت گردی خلاف فتح حاصل کر لین گے۔
