لاہور(پاکستان پوائنٹ نیوز10۔مئی2018ء) 104ورھیاں دے مشہور آسٹریلوی سائنسدان ڈاکٹر ڈیوڈ گوڈال نے خدکشی کرن دا فیصلا کر لیااے۔ ڈاکٹر ڈیوڈ خدکشی کرن لئی سوئزر لینڈ اپڑ گیا۔ غیر ملکی میڈیا مطابق کُجھ دن پہلے ڈاکٹر ڈیوڈ گوڈال نے خدکشی کرن دا اعلان کیتا سی۔ نباتات تے ماحولیات دے ماہر ڈاکٹر ڈیوڈ گوڈال سوئزر لینڈ دے شہر باسل وچ خدکشی کرن لئی اپڑ گئے نیں۔
ڈاکٹر ڈیوڈ گوڈال نے اک پریس کانفرنس راہیں سبھ نوں دسیا سی کہ اوہ خدکشی کرن جا رہے نیں۔ ڈاکٹر ڈیوڈ گوڈال مطابق اوہ اُچا سُندے تے اوہناں دی نظر کمزور اے۔ پر اوہناں دا ذہن ہن بیدار اے۔ ڈاکٹر ڈیوڈ گوڈال دنیا بھر وچ گھمدے تے تحقیق کردے سن۔ پر ہن اوہ وہیل چیئر دے متھاج ہو گئے سن۔ اوہناں دا کہنا اے کہ اوہ پچھلے پنج ورھیاں توں زندگی نوں انجوائے نہیں کر رہے۔
اوہناں دا کہنا سی کہ موت دا تعین کرن لئی انسان نوں آزاد ہونا چاہیدا۔ ڈاکٹر ڈیوڈ گوڈال دا ہور کہنا سی کہ 20ورھے پہلاں میرا ڈرائیونگ لائسنس منسوخ ہو گیا سی ، مینوں اودوں ای مر جانا چاہیدا سی۔ چیتے رہوے کہ سوئزر لینڈ دنیا دا اکلا ملک اے جتھے بہت وڈیرے بندیاں نوں آسان موت یعنی رضا کارانہ موت دی سہولت دتی جاندی اے تاں جے اوہ اپنی بے قرار تے تنگ زندگی نوں آسانی نال ختم کر لین۔ ڈاکٹر ڈیوڈ گوڈوال نوں سوئزر لینڈ دے ایٹرنل سپرٹ کلینک وچ اج اک ٹیکا لا کے موت دی نیندر سوا دتا جائے گا۔
