بھوپال(پاکستان پوائنٹ نیوز01۔مئی2018ء) بھارتی شہر بھوپال وچ محبوبہ دے ویاہ توں انکار اُتے عاشق نے 5لکھ رُپئے ساڑ دتے۔ بھوپال دے رہائشی نوجوان نے عشق وچ ناکامی اُتے دو وار خدکشی دی کوشش وی کیتی جیہدے مگروں پولیس نے اوہنوں گرفتار کر لیا۔ میڈیا رپورٹ مطابق ذکر کیتے گئے 25ورھیاں دے نوجوان نے ویاہ لئی اپنے دفتروں 6لکھ 70ہزار رُپئے چوری کیتے۔
پیسے چوری کرن مگروں محبوبہ نوں ویاہ دا سنیہا گھلیا پر اوہنے انکار کر دتا۔ پولیس نے ملزم خلاف چوری دا مقدمہ درج کرکے اوہنوں گرفتار کر لیا۔ ملزم دے قبضے توں سڑے ہوئے نوٹ تے ہور نقدی وی برآمد ہوئی۔ بھارتی میڈیا مطابق نوجوان نے عشق وچ ناکامی اُتے خدکشی دی کوشش وی کیتی۔ ملزم نے اک وار خدکشی دی کوشش گرفتاری توں پہلا تے دوجی وار جیل وچ کیتی۔
