لندن(پاکستان پوائنٹ نیوز07۔دسمبر2016ء) عالمی شہرت یافتہ پاکستانی نژاد برطانوی باکسر عامر خان دی بیوی فریال مخدوم نے اپنی سس تے ننان ولوں اپنے آپ اُتے کیتیاں جان والیاں گھریلو زیادتیاں دے حوالے نال آواز چُک دِتی۔ تفصیل دے مطابق سوشل میڈیا ’سنیپ چیٹ‘ اُتے اپنے پیغام وچ فریال مخدوم دا کہنا سی کہ کیہ کوئی سوچ سکدا اے کہ اوہدے لئی ایس گل نوں ہضم کرنا بہت مشکل سی کہ اوہناں دے جنت ورگے گھر وچ اوکڑاں وی ہو سکدیاں نیں۔
اپنے پیغام وچ اوہناں دا کہنا سی کہ تُسیں اپنے بالاں دا ویاہ نہ کرو جے تُسیں اوہناں دیاں بیویاں نوں مَندا آکھنا اے تے اوہناںدا مذاق اُڈانا اے، تہانوں کیسا لگے گا جدوں تہاڈی ننان تہاڈے گھر والے دی غیر موجودگی وچ گھر آکے تہاڈے اُتے تشدد کرے تے تُسیں اپنے شوہر دی عزت خاطر آواز نہ چُکے؟ اوہناں دا ہور کہنا سی کہ جے اوہ تہانوں دنیا بھر دے ساہمنے مذاق دا نشانا بنان نوں وی ٹھیک سمجھے تے تُسیں کیہ کرو گے؟ فریال مخدوم نے انکشاف کیتا کہ اوہ اپنے خرچے پورے کرن لئی آپ کم کردیاں نیں، باکسر دی گھر والی دا اپنے پیغام وچ ہور کہنا سی کہ اوہ سویرے 7وجے توں رات 12وجے تیکر ماڈلنگ کرن وچ رُجھیاں رہندیاں نیں حالانکہ اوہناں دا میاں کروڑ پتی انسان اے پر اوہ حق رکھن دے باوجود اوہدے کولوں پیسے نہیں لے سکدیاں تے سونے اُتے سہاگا اوہناں دے سوہرے فیر وی اوہنوں بُرا بھلا کہندے رہندے نیں۔
اپنے اک ہور پیغام وچ فریال نے انکشاف کیتا کہ جدوں اوہ حاملا سن تے اوہدے سوہرے عامر نوں طلاق لین اُتے مجبور کر رہے سن۔ یاد رہوے کہ عامر خان تے فریال مخدوم دا 3سال پہلے نیویارک وچ ویاہ ہویا سی تے اوہناں دی اک دھی وی اے۔
