لندن(پاکستان پوائنٹ نیوز07۔دسمبر2016ء) انگلینڈ پاک بھارت دشمنی نوں کیش کران دی پلاننگ کرن لگا، بورڈ نے ورلڈ کپ 2019دے میگا مقابلے لندن دے اولمپک سٹیڈیم وچ کران لئی غور شروع کر دِتا، 60ہزار تماشائیاں دی گنجائش نے انگلینڈ کرکٹ بورڈ نوں بہت دور دی سوچن اُتے مجبور کر دِتا، نِکی باﺅنڈریز دی وجہ توں آئی سی سی دی اُچیچی اجازت چاہیدی ہووے گی، کاﺅنٹینر ولوں مخالفت دا دا خطرا وی موجود رہوے گا۔
تفصیل دے مطابق انگلینڈ آن والے ورھے چیمپیئنز ٹرافی دی میزبانی کر رہیا اے جہدے وچ پاکستان تے بھارت وچکار مقابلا ایجبسٹن وچ ہووے گا، اوتھے میچ دیاں ٹکٹاں وِکنیاں شروع ہون دے بعد ای کجھ گھنٹیاں وچ ختم ہو گئیاں جدکہ ایسے گل نے انگلش بورڈ نوں ورلڈ کپ 2019لئی لندن دے 60ہزار تماشائیاں دی گنجائش رکھن والے اولمپک سٹیڈیم اُتے غور کرن لئی مجبور کر دِتا اے۔
ایہ سٹیڈیم ایس ویلے ویسٹ ہام یونائیٹڈ دے استعمال ہیٹھ اے پر ورلڈ کپ میچاں دے دوران فٹبال دے حوالے نال آف سیزن ہووے گا۔ انگلش بورڑ پاک بھارت ورگے میگا مقابلیاں دا انعقاد لندن سٹیڈیم وچ کرنا چاہندا اے جہدی گنجائش انگلینڈ وچ موجود کسے وی کرکٹ سٹیڈیم توں دُگنی اے۔ حکام دے مطابق جے ایتھے کرکٹ میچ ہوندے نیں تے فیر سٹینڈز نوں بھرن لئی ٹکٹاں دے ریٹ تھوڑے گھٹ ای رکھنے پین گے۔
