لاہور(پاکستان پوائنٹ نیوز27۔مارچ2017ء) مردان توں تعلق رکھن والے 440کلو بھاری بھلوان خان بابا نے بھارت دے گریٹ کھلی نوں کُھلا چیلنج کر دتا۔ اوہناں نے ایہ گل اپنے اک انٹرویو وچ آکھی۔ خان بابا نے آکھیا کہ میں نہ صرف اک ہتھ نال اوہنوں چُکاں گا بلکہ اوہنوں چُک کے بھوئیں اُتے ماراں گا۔ خان بابا دا ہور کہنا سی کہ مینوں ذاتی طور اُتے گولڈ برگ تے جان سینا پسند نیں پر اجے مینوں ڈبلیو ڈبلیو ای دا لائسنس نہیں مل رہیا، لگدا اے اوہ میرے بھار توں ڈر رہے نیں، میں 100کلو بھارا پتھر چُک لینا واں۔
خان بابا دا کہنا سی کہ میں سویرے چھ وجے توں لے دس وجے تک ورزش کرنا واں، ہر دو گھنٹیاں مگروں کُجھ نہ کُجھ کھانا واں۔ انٹرویو وچ خان بابا دا کہنا سی کہ میں اک ویلے وچ درجن انڈے کھا سکنا واں۔ مینوں فرنی بڑی پسند اے۔ خان بابا دا ہور کہنا سی کہ پی ٹی آئی نے وی میرے لئی کُجھ نہیں کیتا۔ ویاہ بارے گل بات کردے ہوئے خان بابا دا کہنا سی کہ میں 30سال دی عمر وچ ای ویاہ کراں گا اوہ وی کسے ریسلر نال۔
