لاہور(پاکستان پوائنٹ نیوز24۔جنوری2017ء) پاکستان کرکٹ بورڈ دے چیئرمین شہریار خان نے مصباح الحق نوں اپنے آپ کرکٹ چھڈن دا اشارا دے دِتا۔ تفصیل دے مطابق اک انٹرویو وچ شہریار خان دا کہنا سی کہ پاکستان کرکٹ بورڈ مصباح الحق دے ریٹائرمنٹ لین دے فیصلے دی راہ وچ اوکڑ نہیں بنے گا، ایہ فیصلا ہن ٹیسٹ کپتان اُتے چھڈ دِتا اے، اوہ اپنے لئے جو بہتر سمجھن اُنج ای کر لین۔
شہریار خان دا ہور کہنا سی کہ کرکٹ بورڈ مصباح الحق نوں رخصت کرن لئی کوئی الوداعی میچ دین دا نہیں سوچ رہیا اے پر اوہناں دی ملک لئی خدمتاں نوں نظر وچ رکھدے ہوئے ہوئے سوہنے طریقے نال اوہناں نوں رخصت کیتا جائے گا۔یا درہوے کہ ایس توں پہلاں شہریار خان نے اپنے اک انٹرویو وچ آکھیا سی کہ اوہناں دی خاہش اے کہ مصباح 2018تک ٹیسٹ ٹیم دی کپتانی کرن۔
کرکٹ دے ماہراں مطابق ایس گل دا ڈاڈھا امکان اے کہ مصباح الحق ویسٹ انڈیز خلاف اپریل وچ شیڈول ٹیسٹ سیریز دے بعد انٹرنیشنل کرکٹ توں ریٹائرمنٹ لین دا اعلان کر دین گے۔ یا د رہوے کہ شہریار خان دورا انگلینڈ وچ ون ڈے سیریز ہارن مگروں کپتان اظہر علی توں وی مستعفی ہون دی امید رکھدے سن پر اوہناں ولوں کپتانی نہ چھڈن اُتے شہریار خان نے دورا آسٹریلیا دے دوران ای اظہر علی دی قیادت اُتے اعتماد نہ کرن دا وکھالا کر دِتا سی۔
