نیوزی لینڈ کولوں ہار:پاکستان ٹیسٹ رینکنگ وچ 6ویں نمبر اُتے آ گیا

نیوزی لینڈ کولوں ہار:پاکستان ٹیسٹ رینکنگ وچ 6ویں نمبر اُتے آ گیا

ابوظہبی(پاکستان پوائنٹ نیوز07۔دسمبر۔2018ء) نیوزی لینڈ دے خلاف ٹیسٹ سیریز وچ ناکامی مگروں پاکستان نوں انٹرنیشنل کرکٹ کونسل دی نویں رینکنگ وچ بُری خبر دا ساہمنا کرنا پیا اے۔ کیویز نے 102پوائنٹس نال ٹیسٹ سیریز دی شروعات کیتی سی تے سیریز وچ کامیابی نال آسٹریلیا نوں ڈیسمیل پوائنٹس نال پچھے چھڈدے ہوئے رینکنگ وچ اپنی چوتھی پوزیشن پکی کر لئی اے۔

نیوزی لینڈ ہن رینکنگ وچ تیجی پوزیشن اُتے موجود جنوبی افریقہ کولوں صرف اک پوائنٹ دور اے۔ پاکستان نے ایس سیریز دی شروعات 95پوائنٹس توں کیتی سی پر سیریز ہارن مگروں ہن اوہ 93پوائنٹس نال 6ویں نمبر اُتے موجود سری لنکا توں اک پوائنٹ پچھانہ ہوگیا اے۔یاد رہوے کہ اج3ٹیسٹ میچاں دی سیریز دے آخری میچ دے 5ویں تے آخری دن پاکستانی بلے بازاں دے ناقص کھیڈ دی وجہ توں نیوزی لینڈ نے تیجے ٹیسٹ وچ 123سکور توں کامیابی حاصل کر کے ٹیسٹ سیریز 2.1توں اپنے ناں کر لئی اے۔

ٹیسٹ دے آخری دن کیویز نے اپنی اننگز 272سکور4وکٹاں اُتے دوبارہ شروع کیتی تے کین ولیمسن 139سکور بنا کے حسن علی دا شکار بنے۔ کیویز نے جارحانہ بیٹنگ دا وکھالا کردے ہوئے 9اووراں وچ 81سکور کرکے اپنا سکور 353تیکر اپڑایا پر ایس دوران اوہناں دیاں 7وکٹاں وی ڈِگ گئیاں جیہدے مگروں کین ولیمسن نے اننگز ختم کرن دا اعلان کردتا ۔ پاکستان لئی یاسر شاہ نے چار وکٹاں لئیاں تے پاکستان نوں ٹیسٹ سیریز وچ کامیابی لئی گھٹو گھٹ 79اووراں وچ 280سکور دا ٹارگٹ ملیا۔

پاکستان لئی امام الحق تے محمد حفیظ نے اننگز دی شروعات کیتی پر اِک توں بعد دوجا پاکستانی بلے باز واپس جاندا گیا ۔ حفیظ8،اظہر علی5،حارث سہیل9تے اسد شفیق بغیر کوئی سکور بنائے واپس چلے گئے۔ امام الحق 22،سرفراز احمد 28، بلال آصف 12،بابر اعظم 51،حسن علی 4تے انج پوری پاکستانی ٹیم 156سکور بنا کے واپس چلی گئی۔