پاکستانی ٹیم وچ پُن چھان دی تیاری شروع

کارکردگی نہ وکھان و الے کھڈاریاں توں جان چھڈوان دا فیصلا، ویسٹ انڈیز سیریز لئی نوجوان کھڈاریاں نوں چُنیا جائے گا:شہریار خان نے انضمام الحق نال مشورا کر لیا

پاکستانی ٹیم وچ پُن چھان دی تیاری شروع
کارکردگی نہ وکھان و الے کھڈاریاں توں جان چھڈوان دا فیصلا، ویسٹ انڈیز سیریز لئی نوجوان کھڈاریاں نوں چُنیا جائے گا:شہریار خان نے انضمام الحق نال مشورا کر لیا

کراچی(پاکستان پوائنٹ نیوز24۔جنوری2017ء) پاکستانی ٹیم وچ پُن چھان دی تیاری شروع ، کارکردگی نہ وکھان والے کھڈاریاں توں جان چھڈوان دا فیصلا، ویسٹ انڈیز خلاف سیریز لئینوجوان کھڈاریاں نوں چُنیا جائے گا، شہریار خان نے انضمام الحق نال مشورا کر لیا۔ شہریار خان دا کہنا اے کہ ویسٹ انڈیز نال سیریز لئی کئی نوجوان کھڈاریاں نوں چُنیا جائے گا۔ اوہناں دا کہنا سی کہ اسیں ینگ تے متحرک ٹیم بنانا چاہندے آں، اک اُچیچا کیمپ وی لگے گا جہدے وچ فیلڈنگ اُتے بُہتی توجہ دِتی جائے گی۔

اوہناں دے مطابق آسٹریلیا وچ ٹیم دی کارکردگی مَندی رہی، اینے زیادا کیچ ڈراپ کر کے کیویں جتیا جا سکدا اے۔ چیئرمین دا کہنا اے کہ سیریز دوران اظہر علی دے حوالے نال گل نہیں کرنا چاہندا، کپتانی دے حوالے نال فیصلاکُجھ دِناں وچ ہووے گا، اوہناں دے مطابق ریٹائرمنٹ دا فیصلا ہن مصباح الحق اُتے چھڈ دِتا، اوہ جو بہتر سمجھن اُنج کر سکدے نیں۔ یاد رہوے کہ پی سی بی حکام وی مَندی پرفارمنس اُتے ڈاڈھی تشویش دا وکھالا کر چکے نیں تے ایسے گل نوں مُکھ رکھدے ہوئے کُجھ ناکام سینئرز کھڈاریاں نوں فارغ کرن دا فیصلا کیتا گیا اے۔

ایس حوالے نال شہریار خان نے آکھیا کہ آسٹریلیا وچ ٹیم مَندا کھیڈا، فیلڈنگ خاص کر کیچنگ وچ خراب کارکردگی ڈاڈھی خراب رہی۔ اوہناں دا کہنا سی کہ تیجے ون ڈے وچ وی حریف کھڈاریاں نوں کئی موقعے دِتے جدکہ چوتھے میچ وچ تے 5کیچ ڈراپ ہوئے، اینیاں غلطیاں مگروں کیویں جِتیا جا سکدا اے؟ چیئرمین پی سی بی نے آکھیا کہ ویسٹ انڈیز سیریز توں پہلے اسیں کئی نوجوان کھڈاریاں نوں ٹیم وچ شامل کراں گے، ڈومیسٹک سیزن تے ہن پی ایس ایل وچ وی ساریاں دی کارکردگی دا جائزا لِتا جائے گا جہدے مگروں اسیں فیصلے کراں گے، میری ایس حوالے نال چیف سلیکٹر انضمام الحق نال وی گل بات ہوئی، اسیں اک ینگ تے محترک ٹیم بنانا چاہندے آں۔

اوہناں دا کہنا سی کہ اُچیچا کیمپ وی لایا جائے گا جہدے وچ فیلڈنگ اُتے بُہتی توجہ دِتی جائے گی۔