میلبورن(پاکستان پوائنٹ نیوز26۔دسمبر2016ء) قومی کرکٹ ٹیم دے بلے باز اظہر علی نے کیلینڈر ائر وچ ہزار رنز کرلئے،جہدے بعد اوہ کیلینڈر ائر وچ1000سکور کرن والے پاکستان دے 5ویں بلے باز بن گئے۔ تفصیل دے مطابق پچھلے دیہاڑے آسٹریلیا خلاف باکسنگ ڈے ٹیسٹ دے پہلے دیہاڑ اظہر نے چنگی بیٹنگ دا وکھالا کیتا تے اوہ 66سکور نال ناٹ آﺅٹ نیں، اوہ چالو ورھے ہن تیکر 11ٹیسٹ دیاں 21اننگز وچ 1016سکور کر چکے نیں جہدے وچ دو سنچریاں تے 5ففٹیاں شامل نیں، اوہناں دا بہترین سکور 303ناٹ آﺅٹ اے جو اوہناں نے ویسٹ انڈیز خلاف کیتا سی، ایس طرحاں اوہ کیلینڈر ائر وچ ہزار سکور بنان والے پاکستان دے 5ویں بلے باز بن گئے نیں۔
ایس توں پہلے محمد یوسف تے یونس خا ن نوں دو وار ایہ اعزاز ملیا اے جدکہ محسن خان تے انضمام الحق وی ایہ کارناما انجام دے چکے نیں۔
