کولمبو(پاکستان پوائنٹ نیوز15۔دسمبر2016ء) سری لنکا نے واضح کیتا اے کہ اوہ سیریز لئی اپنی نیشنل ٹیم پاکستان گھلن لئی پی سی بی نال گل بات نہیں کر رہیا۔ تفصیل دے مطابق سری لنکا نے واضح کیتا اے کہ اوہ اپنی ٹیم سیریز لئی پاکستان نہیں گھل رہیا۔ یاد رہوے کہ پی سی بی ایگزیکٹو کمیٹی دے سربراہ نجم سیٹھی نے پچھلے دیہاڑے اشارا دِتا سی کہ اوہناں نے وڈی ٹیسٹ ٹیم دی میزبانی لئی ڈیل نوں حتمی شکل دے دِتی جو 2009وچ سری لنکن ٹیم اُتے ہون والے دہشت گرد حملیاں دے بعد کسے اہم ٹیم دا پہلا دورا پاکستان ہو سکدا ے۔
اوہناں دا اپنے بیان وچ ہورکہنا سی کہ دورا پاکستان لئی ویسٹ انڈیز تے سری لنکا دیاں ٹیماں پاکستان آ سکدیاں نیں۔دوجے پاسے سری لنکن وزیر کھیڈ جیا سیکارا ڈیا سری نے ایس تاثر نوں رَد کرد ے ہوئے آکھیا کہ اوہ اپنی ٹیم نوں آن والے ورھے پاکستان گھلن دا کوئی منصوبا نہیں بنا رہے۔ایس توں وکھ چیئرمین پی سی بی شہریار خان جمعے نوں سری لنکا جا رہے نیں جتھے اوہ کولمبو وچ شیڈول ایشیئن کرکٹ کونسل دی میٹنگ دی صدارت کر ن گے۔
ایس موقعے اُتے پاک بھارت کرکٹ حکام دی ملاقات وچ جمود دا شکار دوپاسی تعلقات اُتے دو ٹوک گل بات کیتی جائے گی۔ یاد رہوے کہ بھارتی بورڈ ٹرائنگرلر سیریز سنے مختلف آپشنز ساہمنے رکھ چکیا پر پاکستانی حکام نوں ایس سلسلے وچ تحفظات نیں۔ اجلاس وچ رلت لئی سبحان احمد لاہور توں کولمبو جان گے جدکہ نجم سیٹھی نے سری لنکا نہ جان دا آکھیا اے۔
