وزیر اعلا پنجاب دا قومی کرکٹ ٹیم لئی نیک خاہشاں دا اظہار

لاہور(پاکستان پوائنٹ نیوز15۔ستمبر۔2018ء) وزیر اعلا پنجاب سردار عثمان بزدار نے ایشیاء کپ کرکٹ ٹورنامنٹ شروع ہون اُتے قومی کرکٹ ٹیم دی جت لئی نیک خاہشاں دا اظہار کردے ہوئے آس ظاہر کیتی اے کہ نویں پاکستان وچ قومی ٹیم ایشیاء کپ جت کے قوم نوں تحفہ دیوے گی۔ وزیر اعلا نے آکھیا کہ میریاں نیک خاہشاں تے دعاواں پاکستانی ٹیم دی جت نال نیں۔ کھڈاریاں نوں ایشیاء کپ جتن لئی بیٹنگ، باؤلنگ تے فیلڈنگ وچ شاندار کارکردگی وکھانی پئے گی ، خاص کر روایتی حریف بھارت نوں ہران لئی ٹیم ورک وکھانا پئے گا۔ اوہناں نے آکھیا کہ قومی کرکٹ ٹیم کسے وی ٹیم نوں ہران دی بھرپور صلاحیت رکھدی اے تے آس اے کہ قومی کرکٹ ٹیم ٹورنامنٹ وچ چنگا کھیڈدے ہوئے ایشیاء کپ جِتے گی۔