لاہور(پاکستان پوائنٹ نیوز23۔دسمبر2017ء) پاکستان کرکٹ بورڈ (پی سی بی) نے نیوزی لینڈ دے دورے لئی 15رکنی ٹیم دا اعلان کردتا اے‘ آل راؤنڈر عماد وسیم زخمی ہون کارن سکواڈ وچ تھاں نہ بنا سکے پر اظہر علی دی واپسی ہوئی اے۔ تفصیل مطابق قومی ٹیم دے چیف سلیکٹر انضمام الحق نے ون ڈے سکواڈ دا ا علان کردے ہوئے آکھیا کہ عماد وسیم گِٹے دی انجری کارن پوری طرحاں ٹھیک نہیں ہو سکے سن جہدی وجہ توں اوہناں نوں ڈراپ کر کے محمد نواز نوں ٹیم وچ شامل کیتا گیا اے۔
زخمی فاسٹ باؤلر جنید خان دی تھاں آل راؤنڈر عامر یامین ٹیم دا حصہ ہون گے جدکہ فٹنس ٹیسٹ پاس کرن والے اظہر علی دی وی واپسی ہوئی اے، احمد شہزاد نوں وی ون ڈے سکواڈ توں باہر کر دتا گیا اے۔ سکواڈ دے ہور کھڈاریاں وچ سرفراز احمد (کپتان و وکٹ کیپر) شعیب ملک، شاداب خان، بابراعظم، محمد حفیظ، فہیم اشرف، حسن علی، فخر زمان‘ حارث سہیل، محمد عامر، رومان رئیس تے امام الحق شامل نیں۔
انضمام الحق دا کہنا سی کہ ٹیم دے بوہے کسے لئی وی بند نہیں کیتے، ساڈے نوجوان فاسٹ باؤلرز چنگا کھیڈ پیش کر رہے نیں۔اوہناں دا کہنا سی کہ محمد حفیظ دی باؤلنگ ٹیم نوں فائدہ دیندی اے جے اوہ کلیئر ہو گئے تے ٹیم لئی چنگا ہوئے گا۔ یادر ہوے کہ سرفراز الیون نیوزی لینڈ خلاف سیریز لئی 26دسمبر نوں پاکستانوں جائے گی۔ دوویں ٹیماں وچکار سیریز دا پہلا میچ 6جنوری نوں ہوئے گا۔
