لاہور(پاکستان پوائنٹ نیوز01۔مئی2017ء) پاکستان سپر لیگ دے تیجے ایڈیشن وچ 6ویں ٹیم نوں شامل کرن لئی پاکستان کرکٹ بورڈ نے 5ریجنز دے ناں دے دتے نیں پر حیرت دی گل ایہ کہ ایہدے وچ کشمیر یاں گلگت بلتستان دی ٹیم دا کوئی ناں شامل نیں اے، جہدے اُتے کرکٹ نال پیار کرن والے لوک سوال چُکن لگے۔ تفصیل دے مطابق اپریل 2016وچ سماجی رابطے دی ویب سائٹ اُتے اپنے پیغام وچ پاکستان سپر لیگ دی کورننگ کونسل دے چیئرمین تے پی سی بی ایگزیکٹو کمیٹی دے سربراہ نجم سیٹھی نے آکھیا سی کہ کشمیر دے ناں توں 6ویں ٹیم ساہمنے لیانا میرا خاب اے، جہدے لئی امید اے کہ 5ویں فرنچائز سپورٹ کرے گی۔
دوجے پاسے پی سی بی نے ہن تیجے ایڈیشن وچ 6ویں ٹیم دی رلت دا فیصلا کردے ہوئے بڈز دا عمل 30مئی نوں مکمل کرن دا اعلان کیتا اے۔ پی سی بی حکام دے مطابق نویں فرنچائز نوں 5رینجنز، فاٹا، ملتان، فیصل آباد، حیدر آباد تے ڈیرا مراد علی وچوں کسے اک دا ناں دتا جائے گا پر حیرت دی گل اے کہ پی ایس ایل وچ 6ویں ٹیم لئی کشمیر تے گلگت بلتستان دا ذکر تک نہیں ہویا، جہدے اُتے کرکٹ نال پیار کرن والیاں نے سوشل میڈیا اُتے نویں بحث چھیڑ دے ہوئے آکھیاکہ چاراں صوبیاں تے اسلام آباد دی نمائندگی دے نال نال کشمیر یاں گلگت بلتستان دی ٹیم شامل کرن دے نتیجے وچ دنیا بھر وچ پاکستان دے حوالے نال چنگا پیغام جاندا اے پر ایس فیصلے پچھے کوئی سیاسی وجہ لگدی اے۔
