لندن(پاکستان پوائنٹ نیوز25۔فروری2017ء) برطانیا دی بریڈ فورڈ لیگ دے لائٹ کرکٹ کلب وچ پریکٹس دے دوران اک کھڈاری دے مونہ اُتے گیند وجن نال کھوپڑی تے مونہ دی ہڈی 15تھاں توں ٹُٹ گئی۔تفصیل دے مطابق 13فروری نوں لائٹ کرکٹ کلب دے کھڈاری ایلکس نیٹ وچ باﺅلنگ کروا رہے سن کہ بلے بازنے شارٹ ماری تے گیند اوہناں دیاں اکھاں وچکار وَجی، گیند وَجن دے نتیجے وچ اوہناں دے مَتھے، نَک، اکھاں تے گَلاں دیاں ہڈیاں سنے 15ہڈیاں ٹُٹ گئیاں، حادثے مگروں ایلکس نوں ہسپتال داخل کر لیا گیا جتھے 10دن بعدں ہسپتال والیاں نے اوہنوں دسیا کہ حادثے دے نتیجے وچ پیدا ہون والیاں پیچیدگیاں نوں حل کرن لئی کئی آپریشنز کرنے پین گے، اک آپریشن دے دوران ایلکس دے دوویں کَناں وچکار موجود ماس نوں کٹ کے موڑیا جائے گا تے فیر مَتھے پِچھے لوہے دیاں پلیٹاں وی رکھیاں جان گیاں، اوہدے مگروں اکھاں تے نَک دا آپریشن وی کیتا جائےگا، جہدے مگروں دعاغی حالت دی پُن چھان وی کیتی جائے گی تاں جے ایس حادثے دے نتیجے وچ دماغ نوں اَپڑن والے نقصان دا پتا لگ سکے۔
حادثے مگروں ایلکس کئی مہینیاں تک کوئی کم نہیں کر سکے گا۔اوہدا اک پُتر اے جدکہ اک ہور بال دی اوہدے گھر آن دی امید اے، پچھلے دِنا نوکری دی بدلی پاروں اوہنوں میڈیکل دی سہولت وی نہیں مل سکی ، علاج لئی فنڈ اکٹھا کرن لئی ایلکس نوں انٹرنیٹ دا سہارا لینا پیا جتھے ہن تک برطانوی ٹیسٹ کپتان، جوروٹ تے سابق کھڈاری ڈیوڈ لائیڈ سنے ہور بندیاں نے اوہدے لئی 4500پاﺅنڈ دا انتظام کر لیا اے۔ ایلکس دا کہنا سی کہ اوہنے اپنی ساری زندگی فٹبال تے کرکٹ کھیڈی اے ، ایس دوران اوہنوں بڑیاں سَٹاں وی لگیاں پر ایس حادثے نے اوہنوں ہلا کے رکھ دِتا اے ، جس کارن اوہنوں ہن کرکٹ تے فٹبال کھیڈنا وی چھڈنا پئے گا۔
