لاہور(پاکستان پوائنٹ نیوز25۔فروری2017ء) قومی ٹیسٹ ٹیم دے کپتان مصباح الحق تے سینئر بلے باز یونس خان نے قائد اعظم ٹرافی گریڈ ’ٹو‘ سیزن کھیڈن لئی رضا مندی دا وکھالا کر دِتا اے۔ وسیلیاں دے مطابق 7مارچ توں شروع ہون والے قائد اعظم ٹرافی گریڈ ’ٹو‘ سیزن وچ مصباح الحق فیصل آباد تے یونس خان ایبٹ آباد ولوں گریڈ ’ٹو‘ کرکٹ کھیڈدے نظر آن گے، دوویں کھڈاریاں دی زیادا توجہ ایس گل اُتے ہووے گی کہ اپنیاں ٹیماں نوں چیمپیئن بنوا کے اک وار فیر قائد اعظم ٹرافی گریڈ ’ون‘ وچ تھاں دوائیے۔
72ٹیسٹ میچاں وچ 10سنچریاں نال 4951سکور کرن والے مصباح الحق ایس گل داذکر کرچکے نیں کہ جس فیصل آباد نے ملکی کرکٹ نوں اوہناں سنے سعید اجمل،محمد حفیظ تے کئی ہور ٹیسٹ کرکٹرز دِتے، اج ایہ ٹیم فرسٹ کلاس ٹورنامنٹ لئی کوالیفائی راﺅنڈ کھیڈ رہی اے۔ ایبٹ آباد ولوں کھیڈن والے ٹیسٹ کرکٹرز یاسر شاہ تے جنید خان قومی ٹیم تک پہنچے تے اج ایبٹ آباد وی ریجن گریڈ ’ٹو‘ ٹورنامنٹ کھیڈ رہیا اے، 9ٹیسٹ میچاں وچ قومی ٹیم دی قیادت کرن والے یونس خان بیتے ویلے وچ ایبٹ آباد لئی کھیڈدے رہے نیں، 34ٹیسٹ سنچریاں نال ریکارڈ 9977سکور بنان والے یونس خان نوں 10ہزار ٹیسٹ سکور پورے کرن لئی صرف 23سکور چاہیدے نیں تے ایس گل دی امید کیتی جا رہی اے کہ یونس خان دورا ویسٹ انڈیز وچ تن میچاں دی سیریز دے دوران ٹیسٹ کرکٹ وچ پاکستان ولوں 10ہزار سکور کرن والے پہلے کھڈاری بنن دا اعزاز حاصل کر لین گے۔
