اسلام آباد(پاکستان پوائنٹ نیوز24۔جنوری2017ء) برطانوی ماہرین صحت دا کہنا اے کہ چاﺅل، مرغا تے آلوواں نوں بار بار گرم کر کے کھان نال کئی روگ جنم لے سکدے نیں۔ لندن برنس یونیورسٹی دے ماہرین دا کہنا اے کہ کئی بندے سالن نوں دوبارا گرم کر کے کھاندے نیں تے ایہ عادت ہر گھراندر اک دن وچ کئی وار دُہرائی جاندی اے۔ ماہرین دا کہنا اے کہ کئی بندے ایہ نہیں جاندے نیں کہ کُجھ کھان پین والیاں شیواں ایسراں دیاں ہوندیاں نیں کہ جو دوبارا گرم کرن نال زہریلیاں ہو جاندیاں نیں، جہدے نتیجے وچ خطرناک قسم دے روگ لگ سکدے نیں۔
ایہو نہیں جے ایہناں شیواں نوں چنگے طریقے نال محفوظ نہ کیتا جائے تے ایہناں نوں کھانا صحت نوں خراب کرن دے برابر اے، ایہناں شیواں نوں دوبارا گرم کر کے کھان توںپرہیز کیتا جائے تے ایہناں نوں چنگے طریقے نال رکھیا جائے۔ ماہرین دے مطابق چاﺅلاں نوں دوبارا گرم کرن نال وی ایہ اجزا ختم نہیں ہوندے، ایس لئی چاﺅلاں نوں کسے ٹھنڈی تھاں یاں فریج وچ رکھو۔
چکن سنے پولٹری دیاں ساریاں شیواں وچ سالمونیلا ناں دا اک جراثیم ہوندا اے جو بک بکا اے پر پکان مگروں دوبارا درجہ حرارت ملن دی صورت وچ ایہ صحت لئی چنگا نہیں ہونداایس لئی مرغی نوں دوبارا گرم کرن توں پرہیز کیتا جاناچاہیدا۔ ماہرین دا کہنا اے کہ آلو پکان مگروں فریج وچ رکھ دینے چاہیدے۔ روٹین دا روم ٹمپریچر ایہدے وچ بوٹول ازم ناں دے جراثیم نوں جنم دین وچ مدد کردا اے جو جُسے نوں مختلف روگ لا دیندا اے۔ ماہرین نے مشورا دیندے ہوئے آکھیا اے کہ صحت مند رہن لئی ضروری اے کہ کھانا تازا ای ورتیا جائے۔
