ملک بھر وچ آرمی پبلک سکول دُکھانت ورگے اک ہور حملے دا خطرہ

ملک بھر وچ آرمی پبلک سکول دُکھانت ورگے اک ہور حملے دا خطرہ

کراچی(پاکستان پوائنٹ نیوز15۔دسمبر۔2018ء) ملک بھر وچ آرمی پبلک سکول دُکھانت ورگے اک ہور حملے دا خطرہ اے۔ تفصیل دے مطابق ملک بھر وچ بھارتی و افغان خفیہ ایجنسیاں خون دی ہولی کھیڈن دی تیاری تے منصوبہ بندی کر چکیاں نیں۔ وفاقی حکومت نے چاراں صوبائی حکومتاں نوں ایس سلسلے وچ خبردار کیتا اے کہ بھارتی خفیہ ایجنسی ’را‘ تے افغانستان دی خفیہ ایجنسی ’سی این ڈی‘ ملک وچ اک وار فیر آرمی پبلک سکول پشاور اُتے ہون والے حملے ورگا حملا یاں فیر کسے سیاسی شخصیت اُتے حملا کرن دی منصوبہ بندی کر چکیاں نیں۔

وفاقی وزارت داخلا ولوں جاری کیتے گئے تھریٹ الرٹ وچ چاراں صوبائی حکومتاں نوں خبردار کیتا گیا اے کہ آرمی پبلک سکول دُکھانت دی ورسی(برسی) 16دسمبر نوں اے۔ بھارتی خفیہ ایجنسی ’را‘ تے افغانستان دی خفیہ ایجنسی ’این ڈی ایس‘ نے آرمی پبلک سکول دُکھانت ورگی کارروائی دوبارہ دوہران دی منصوبہ بندی کیتی اے۔ ایسے خطرے نوں مُکھ رکھدے ہوئے کسے وی ممکنہ تخریب کاری تے دہشت گردی نوں روکن لئی سخت حفاظتی انتظامات کیتے جان ۔ اہم سیاسی بندیاں تے اہم بلڈنگاں دی سکیورٹی لئی سخت اقدامات کیتے جان تاں جے دشمن دے خطرناک تے ناپاک ارادیاں نوں خاک وچ ملایا جا سکے۔